وتكەن جىلى مەملەكەتتىك قازىناعا الماتى 1 تريلليون تەڭگە كولەمىندە سالىق قۇيدى
«بۇگىن وزدەرىڭىزبەن بىرگە قالامىزدىڭ وتكەن جىلداعى الەۋمەتتىك- ەكونوميكالىق دامۋىن قورىتىندىلاپ، الداعى ىستەردى ايقىندايتىن كەزدەسۋدە باس قوسىپ وتىرمىز.
وتكەن جىل اۋقىمدى قوعامدىق- ساياسي وقيعالارعا تولى بولدى. ءبىزدىڭ باستى مىندەتىمىز - قالا تۇرعىندارىنىڭ ءومىر ءسۇرۋ سۇرانىستارىن قامتاماسىز ەتۋ. ونىڭ باستى كىلتى تۇراقتى جالاقى مەن جۇمىس ورنى، باسپانا، ساپالى ءبىلىم. وتكەن جىل قورىتىندىسى بويىنشا، ج ا ءو 6,3 پايىزعا ارتتى. بۇل ەلىمىزدە وتە جوعارى كورسەتكىش بولىپ وتىر.
سوڭعى 5 جىلدا ج ا ءو 8 تريلليون تەڭگەگە جەتتى. بۇل جالپى ىشكى ءونىمنىڭ 20 پايىزىن قۇرايدى. قالادا 23 مىڭعا جۋىق جۇمىس ورنى قۇرىلدى»، - دەدى قالا باسشىسى.
احمەتجان ەسىموۆ الماتى قالاسىنىڭ رەسپۋبليكانىڭ باستى قارجىلىق دونورى ەكەنىن اتاپ ءوتتى. 2014 - جىلدى قورىتىندىلاۋ ەسەبىندە كورسەتىلگەندەي، ءبىر جۇمىسكەردىڭ ورتاشا ايلىعى 154945 تەڭگەگە جەتتى.
جۇمىسسىزدىق دەڭگەيى ەكونوميكالىق بەلسەندى حالىقتىڭ 5,5 پايىزىن قۇرادى. مەملەكەتتىك بيۋدجەتكە كەدەندىك تولەمدى، سالىقتار جانە باسقا مىندەتتى تولەمدەردەن 1429,1 ميلليارد تەڭگە ءتۇستى. 4,5 پايىزعا ارتتى.
ونىڭ ىشىندە رەسپۋبليكالىق بيۋدجەتكە كەدەندىك تولەمدەردى قوسا العاندا 1 121,3 ميلليارد تەڭگە، جەرگىلىكتى بيۋدجەتكە 307,8 ميلليارد تەڭگە قۇيىلدى.
ايتا كەتەيىك، 2014 - جىلى الماتىنىڭ ناقتى بيۋدجەتى 352,3 ميلليارد تەڭگەنى قۇرادى.
