پايعامبارىمىز (س. ا. ۋ.) 1 ميلليون مۇسىلماندى اياعىنان تىك تۇرعىزدى - فوتو

اتالعان شاراعا تەك شەشەنستان حالقى عانا ەمەس، سونىمەن قاتار، وزگە دە ەلدەردەن كەلىپ قاتىسقاندار بولدى. سولاردىڭ اراسىندا پايعامبارىمىزدىڭ تىكەلەي ۇرپاعى شەيح حابيب الي جيفري، رەسەي مۇفتيلەر كەڭەسى مەن رەسەي فەدەراتسياسى مۇسىلماندارى ءدىني باسقارماسىنىڭ ءتوراعاسى راۆيل گاينۋتدين، ماحاچكالا جانە گروزنىي ەپيسكوپى ۆارلاامدى ەرەكشە اتاپ وتۋگە بولادى.

شەرۋگە شىققاندار قولدارىنا «No Charlie Hebdo»، «سۇيىكتى پايعامبارىمىز مۇحاممەدتەن (س. ا. ۋ.) قولىڭدى تارت!»، «ءبىز كاريكاتۋراعا قارسىمىز! سۇيىكتى پايعامبارىمىزدى قانشالىقتى سۇيەتىنىمىزدى سەندەر ءبارىبىر تۇسىنەر ەمەسسىڭدەر!»، «مۇحاممەد - ادامزاتتىڭ ارداقتىسى» دەگەن جازۋلار ۇستاپ شىققان.

نارازىلىق شەرۋىنىڭ ماقساتىن اتاپ وتكەن شەشەنستان پرەزيدەنتى رامازان قادىروۆ: «بۇل نارازىلىق شەرۋى پايعامبارىمىزعا قاتىستى كاريكاتۋرا جاريالاعانداردى قولدايتىندارعا قارسى شەرۋ، بۇل شەرۋ مۇسىلمانداردىڭ ءدىني سەنىمدەرىن اياققا تاپتايتىندارعا قارسى شەرۋ، بۇل شەرۋ ءدىني جانە ۇلتارالىق ارازدىقتى قوزدىرۋشىلارعا قارسى شەرۋ!» - دەدى.

سونداي-اق، ول شەرۋگە قاتىسۋشىلار كاريكاتۋرا سالعانداردى جانە ونى ءسوز بوستاندىعى دەپ قولداعان ساياساتكەرلەردى ايىپتايتىنىن جەتكىزدى. «بۇگىندە ءبىز ەۋروپانىڭ پاريجدەگى قانتوگىستەن ءتيىستى قورىتىندى شىعارماعانىن كورىپ وتىرمىز. فرانسيا ۇكىمەتى قان توككەن لاڭكەستەر مەن بۇعان وزدەرىنىڭ كاريكاتۋرالارىمەن تۇرتكى بولىپ وتىرعان جۋرناليستەردى ايىپتاعاننىڭ ورنىن قانتوگىسكە اكەپ سوعاتىن بەتىمەن كەتۋشىلىكتى جاقتاعان لوزۋنگتەرمەن كوشەگە شىعىپ شوۋ ۇيىمداستىردى»، - دەدى ول.

پايعامبارىمىزدىڭ تىكەلەي ۇرپاعى بولعان شەيح حابيب الي جيفري رامازان قادىروۆقا «پايعامبارىمىز مۇحاممەدتىڭ (س. ا. ۋ.) قورعاۋشىسى» اتاعىنا لايىق ەكەنىن ايتتى. «ءسىزدى قاسيەتتى جادىگەرلەردىڭ، تابارىكتەردىڭ ساقتاۋشىسى رەتىندە تانيمىن. سونداي-اق، سۇيىكتى پايعامبارىمىزدى قانشالىقتى سۇيەتىنىڭىزدى دە جاقسى بىلەمىن. سوندىقتان دا، سىزگە «پايعامبارىمىزدىڭ قورعاۋشىسى» مارتەبەسىن دە بەرگىم كەلەدى»، - دەدى ول.

مىنبەرگە شىعىپ ءسوز العان رەسەي مۇفتيلەر كەڭەسىنىڭ ءتوراعاسى راۆيل گاينۋتدين دە لاڭكەستىك پەن ءدىننىڭ ەكى بولەك نارسە ەكەنىن تىلگە تيەك ەتتى: «تەرروريستەردىڭ نە جەكەلەگەن ادامداردىڭ قىلمىستارىنا قاراپ ءدىندى كىنالاۋعا بولمايدى. وسى جەرگە جينالعاندار، رەسەي مۇسىلماندارى، جالپى بارلىق الەم مۇسىلماندارى «يسلام ول - بەيبىتشىلىك!» ەكەنىن ايتامىز. اللا بىزدەن بەيبىتشىلىك پەن ماحابباتتى جايۋدى ءامىر ەتەدى. ءبىز بارشامىز تەرروريزم مەن قىلمىسقا قارسىمىز!»، - دەدى ول.

Islam.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى