قىزىلوردادا ءۇش كۇندە تابيعات قورعاۋ زاڭناماسىن بۇزعان 19 دەرەك انىقتالدى
بۇل تۋرالى وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باسشىسى باۋىرجان يبرايەۆ مالىمدەدى، دەپ حابارلايدى قازاقپارات ءتىلشىسى.
«20-قازاننان قاراشا ايىنىڭ 19 نا دەيىن وبلىس كولەمىندە «براكونەر» جەدەل-پروفيلاكتيكالىق ءىس-شاراسى وتۋدە. ءىس-شارانىڭ باستى ماقساتى - تابيعات قورعاۋ زاڭناماسىن بۇزۋشىلاردى، بيولوگيالىق- رەسۋرستىق وبەكتىلەر مەن زاڭسىز اينالىمدى انىقتاۋ جانە ولاردىڭ جولىن كەسۋگە باعىتتالعان. جۇرگىزىلگەن رەيد بارىسىندا پوليتسەيلەر 3 كۇندە تابيعات قورعاۋ زاڭناماسىن بۇزعان جالپى 19 دەرەكتى انىقتادى. ونىڭ ىشىندە، جانۋارلار دۇنيەسىن پايدالانۋ جانە اڭ اۋلاۋ قاعيداتىن بۇزعان 10 دەرەك اشكەرە بولدى. بالىق اۋلاۋ جانە باسقا دا سۋ جانۋارلارىن قورعاۋ قاعيداتىن بۇزۋدىڭ 5 دەرەگى تىركەلدى»، - دەپ ءمالىم ەتتى باۋىرجان يبرايەۆ.
ايتا كەتەيىك، قازاقستان رەسپۋبليكاسىنىڭ زاڭناماسىنا سايكەس، اتالعان باعىتتاعى زاڭ بۇزۋشىلىق ارەكەتتەر ءۇشىن اكىمشىلىك نەمەسە قىلمىستىق جاۋاپكەرشىلىك قاراستىرىلعان.
