قاراعاندىدا 19 مىڭنان استام ءدارى- دارمەك مەدساقتاندىرۋ اياسىندا تەگىن بەرىلگەن
قور ءدارى- دارمەكتىڭ قۇنىن تولەۋگە 1,5 ميلليارد تەڭگە ءبولدى. وسى قاراجاتتان 225 ميلليون تەڭگە شاشىراڭقى سكلەروزى بار 147 پاتسيەنتكە ءدارى- دارمەك تولەۋگە، 435,7 ميلليون تەڭگە بۇلشىقەت ديستروفياسى بار ەكى پاتسيەنتكە ارنالعان پرەپاراتتارعا جۇمسالدى.
«تەگىن ءدارى- دارمەك، سونداي-اق مەديتسينالىق قىزمەتتەر قازاقستاندىقتارعا مەديتسينالىق كومەك كورسەتۋدىڭ ەكى پاكەتى - تەگىن مەديتسينالىق كومەكتىڭ كەپىلدىك بەرىلگەن كولەمى (ت م ك ك ك) جانە مەديتسينالىق ساقتاندىرۋ شەڭبەرىندە قولجەتىمدى. ەگەر ءبىرىنشى پاكەتتە مارتەبەسىنە قاراماستان (ساقتاندىرىلعان نەمەسە ساقتاندىرىلماعان) ونكولوگيالىق اۋرۋلارمەن، قانت ديابەتىمەن، تۋبەركۋلەزبەن جانە باسقا دا تۇرلەرىمەن اۋىراتىن پاتسيەنتتەردى تەگىن ءدارى- دارمەكپەن قامتاماسىز ەتۋ سالىنعان بولسا، مەديتسينالىق ساقتاندىرۋ پاكەتى شەڭبەرىندە تەگىن مەديتسينالىق پرەپاراتتاردى سيرەك كەزدەسەتىن اۋرۋلارى بار ساقتاندىرىلعان ازاماتتار عانا الادى. وتكەن جىلدان باستاپ بۇل تىزىمگە ديۋشەننىڭ بۇلشىقەت ديستروفياسى، باس سۇيەك نەرۆتەرىنىڭ زاقىمدانۋى، التسگەيمەر اۋرۋى، اللەرگيالىق رينيت، گلاۋكوما، ەندومەتريوز جانە باسقا سىرقاتتار كىردى»، - دەپ اتاپ ءوتتى مەديتسينالىق ساقتاندىرۋ قورى قاراعاندى فيليالىنىڭ ديرەكتورى فازىل كوپوبايەۆ.
پاتسيەنتتەر ءۇشىن قاجەتتى پرەپاراتتار مەن مەديتسينالىق بۇيىمداردى تىركەلگەن جەرى بويىنشا مەديتسينالىق ۇيىمدار ساتىپ الادى، ولاردى مەديتسينالىق ساقتاندىرۋ قورى تولەيدى. ت م ك ك ك جانە مەديتسينالىق ساقتاندىرۋ پاكەتى شەڭبەرىندە 141 اۋرۋ بويىنشا ءدارى-دارمەكپەن قامتاماسىز ەتۋ كوزدەلگەن.
