پاۆلودار وبلىسىندا 19 اناعا «التىن القا» مەن «كۇمىس القا» تابىستالدى
8- ناۋرىز قارساڭىنداعى سالتاناتتى جيىن ەستاي اتىنداعى مادەنيەت سارايىندا ءوتتى. جيىندا ءوڭىردىڭ دامۋىنا ۇلەس قوسقان ايەلدەر دە ماراپاتتالدى. مەرەكە يەلەرىنە ارنالىپ سارايدىڭ كىرە بەرىسىندە ايەلدەردىڭ ۇلتتىق اشەكەيلەرى جانە پاۆلودارلىق سۋرەتشىلەر سالعان ايەلدەردىڭ پورترەتتەرىنەن كورمە قويىلدى.
جينالعان ايەلدەر قاۋىمىن قۇتتىقتاعان پاۆلودار وبلىسىنىڭ اكىمى بولات باقاۋوۆ نازىك جاندىلار قاي سالادا دا قيىن مىندەتتەردى اتقارىپ جەتىستىككە جەتىپ جۇرگەندەرىن اتاپ ءوتتى.
«ءبىزدىڭ قوعامدا ايەل دەگەن - وتباسىن عانا ويلايتىن تۇلعا ەمەس، مەملەكەتتىك قىزمەتتە، قوعامدىق جۇمىستا، كاسىپكەرلىكتە، بىلىمدە، دەنساۋلىق ساقتاۋ جانە وزگە دە سالادا بەلسەندى جاندار. سىزدەردى ءومىر سۇرۋگە دەگەن قۇلشىنىستارىڭىز بەن كوزدەگەن ماقساتتان تايماۋعا تىرىسۋلارىڭىز ەرەكشەلەندىرەدى. تاڭقالارلىعى كوپشىلىگىڭىز مەيىرىممەن بالانى تاربيەلەۋ، ءۇيدىڭ كوپتەگەن ماسەلەلەرىن شەشۋ، جۇمىسقا دا ۇلگەرۋ، قوعامدىق شارالارعا بەلسەندى ارالاسۋدىڭ بارىنە ۇلگەرىپ جاتاسىزدار»، - دەدى وبلىس اكىمى.
پاۆلودار وبلىسىنىڭ كوپبالالى انالارىنا ءوڭىر باسشىسى ەرەكشە العىس ءبىلدىردى. 19 انا «التىن القا» مەن «كۇمىس القاعا» يە بولدى.
سونىمەن قاتار، وبلىس اكىمى اۋىر ونەركاسىپتە، دەنساۋلىق ساقتاۋ مەن ءبىلىم بەرۋ سالاسىندا، مەملەكەتتىك قىزمەت جانە وزگە دە سالالاردا ەڭبەك ەتكەن ايەلدەرگە العىس حاتتار مەن قۇرمەت گراموتالارىن تابىستادى.
كەشتى «اناشىم» ءانىن ورىندايتىن مارات وماروۆ، بەيبىت كۇشقاليەۆ جانە «مەلومەن» توبى سىندى قازاقستاندىق تانىمال مۋزىكانتتار ونەر كورسەتكەن ءبىر جارىم ساعاتتىق كونسەرت جالعاستىردى.
ساحنادا تەك جۇلدىزدار عانا ءان ايتىپ قانا قويماي، كاسىبي ەمەس ارتىستەر دە ونەر كورسەتتى.
مىسالى، «نۇر وتان» پارتياسى وبلىستىق فيليالى ءتوراعاسىنىڭ ءبىرىنشى ورىنباسارى نيكولاي دىچكو دومبىرامەن داۋلەتكەرەيدىڭ «كورۇعلى» كۇيىن شەرتتى.
ال، كاسىپكەرلىك، ساۋدا جانە تۋريزم باسقارماسىنىڭ باسشىسى داستان رىسپەكوۆ پەن دەنە تاربيەسى جانە سپورت باسقارماسىنىڭ باسشىسى مارات ايداشيەۆ ءان سالدى.
