تالعات تەمەنوۆ 19 كۇندە ءبىر فيلمدى ءتۇسىرىپ شىقتى
فيلمنىڭ تۇساۋكەسەرى حالىقارالىق بالالاردى قورعاۋ كۇنى اياسىندا ءوتىپ وتىر. رەجيسسەر بيبول ەسىمدى كەيىپكەرى ارقىلى قازىرگى تاستاندى بالالار ماسەلەسىن كوتەرىپ قانا قويماي، وتباسى - وشاق قاسىنداعى پروبلەمالاردى دا قوزعايدى.
اكە مەن بالانىڭ اراسىنداعى قارىم-قاتىناس - اقشا ءۇشىن اكە-شەشەسىن قارتتار ۇيىنە تاپسىرۋدان تايىنبايتىن ادامداردى دا كورسەتەدى. وقيعا جەلىسى التى جاسار بيبول مەن قاسىمحان قاريانىڭ اينالاسىندا ءوربيدى. بيبولدى ءۇش جاسىندا اناسى ساياباققا تاستاپ كەتكەن. سودان ول ينتەرناتقا تۇسەدى.
ال مۋزىكا ءپانىنىڭ مۇعالىمى، پروفەسسور قاسىمحان اتانىڭ ءبىر عانا قىزى بار. الايدا ول اقشاعا ابدەن قۇنىعىپ، اكەسىنە ءۇيىن ساتقىزىپ، قارتتار ۇيىنە توعىتپاقشى بولادى. سول ەكى ارادا قاريا بيبولدى كەزدەستىرەدى. كىشكەنتاي بالا قارتتى قيالىنداعى اتاسىنا ۇقساتىپ، بىردەن باۋىر باسىپ قالادى.
دەگەنمەن، قاسىمحان قاريا قىزىنىڭ ايتقانىنان شىعا الماي جۇرەدى. سيرككە بارىپ، اداسىپ كەتكەن بيبولدى تۋعان اناسى دا تەلەديداردان كورىپ، ىزدەۋگە كىرىسەدى. ءسويتىپ، سەزىمتال ءارى ارمانشىل بالا تۋعان اناسىنىڭ دا، ءتىپتى بوتەن ادامنىڭ جۇرەك تۇكپىرىندەگى سەزىمدەرىن وياتادى.
وقيعانىڭ قالاي اياقتالعانىن قىركۇيەك ايىندا كورۋگە بولادى. رەجيسسەر تالعات تەمەنوۆتىڭ ايتۋىنشا، فيلمنىڭ جابىق تۇساۋكەسەرى بۇگىن وتسە دە، قىركۇيەك ايىندا ونى قالىڭ كورەرمەنگە كورسەتۋ جوسپارلانىپ وتىر. «بۇل فيلم 19 كۇندە ءتۇسىرىلدى. بيۋدجەتى دە ۇلكەن ەمەس. دەگەنمەن، ءبىز ادامگەرشىلىكتىڭ باستى قۇندىلىقتارىن كورسەتە بىلدىك دەپ ويلايمىن. بيبولدىڭ ءوزىن ەكى مىڭ بالانىڭ ىشىنەن تاڭداپ الدىق»، - دەيدى تەمەنوۆ.
بيبولدىڭ ءرولىن ءانۋار تولەۋعاجى سومدادى. ال قاسىمحان قاريانى تولەۋبەك ارالباي وينادى. بۇدان بولەك، كارتينادا قاليبەك قۋانىشبايەۆ اتىنداعى قازاق مۋزىكا جانە دراما تەاترىنىڭ ءبىراز ارىستەرىن كورۋگە بولادى.
كومپوزيتورى - تولەگەن مۇحامەدجانوۆ. ءانشى نۇرجامال ۇسەنبايەۆانىڭ دا فيلمدە ءوز دەبيۋتىن جاساعانىن اتاپ وتكەن ءجون. اتالعان تۋىندى ق ر مادەنيەت جانە سپورت مينيسترلىگىنىڭ تاپسىرىسى بويىنشا ءتۇسىرىلدى. بۇگىنگى جابىق كورسەتىلىمگە مينيستر ارىستانبەك مۇحامەدي ۇلى دا قاتىستى.
