ايگىلى قازاق ميللياردەرى 1990-جىلدارى بايلىققا قالاي كەنەلدى؟
90-جىلدارى اتاقتى «سەيمار» كومپانياسىنىڭ نەگىزىن قالاۋشى، بۇگىندە تاجىريبەلى كاسىپكەر بيزنەسمەندەر جيىنىندا جاستارعا بۇرىن ەش جەردە ايتىلماعان، بىردە-ءبىر كىتاپتا جازىلماعان قۇندى ويلارىن ورتاعا سالدى.
سونىمەن، اتاقتى بيزنەسمەن ەلىمىزدەگى ءىرى بانك پەن ۇيالى بايلانىس قىزمەتىن ۇسىناتىن كومپانيانى قالاي يەلەندى؟ ونىڭ ميللياردقا قول جەتكىزۋىنىڭ سىرى نەدە؟ ءىرى جەڭىستەر مەن جەڭىلىستەردىڭ كۋاسى بولعان كاسىپكەر جاستارعا نە دەدى؟
بارلىعى تابىستى ادامداردىڭ قۇپياسىن بىلگىسى كەلەدى. ولارعا ايتارىم - بۇل ەش ناتيجە بەرمەيتىن پايداسىز ارەكەت. تابىس اركىمگە وزىنشە كەلەدى. بىرەۋدىڭ جولىن قايتالاۋ مۇمكىن ەمەس.
بيزنەستەگى پروبلەمالار مەن قاتەلىكتەر ءبىرىڭعاي. سوندىقتان قاتەلىكتەردەن قاشۋ نەمەسە ونى شەشىپ ۇيرەنۋ ماڭىزدىراق.
بيزنەستە جەڭىلمەۋ وزىڭىزگە بايلانىستى، ال جەڭۋ مۇمكىندىگىڭىز ءسىزدىڭ قارسىلاسىڭىزدان. ياعني، تابىسقا جەتۋ ءۇشىن ەڭ الدىمەن جەڭىلمەۋدى ۇيرەنۋ كەرەك.
تابىس ەكى نارسەدەن تۇرادى: دايىندىق جانە مۇمكىندىك. دايىندىق ساقاداي ساي بولعان كەزدە وعان مۇمكىندىك جولىقسا تابىسقا جەتۋگە بولادى. دايىندىق ءار ادامنىڭ ىشكى جۇمىسى.
ال، مۇمكىندىك دەگەنىمىز كەزدەيسوق جاعداي. دايىندالۋ - تاۋعا شىققانمەن تەڭ. دايىندىعىڭىز قانشالىقتى جوعارى بولسا، ءسىز سونشالىقتى مۇمكىندىكتەردى كورەسىز. سوندىقتان ەشكىمنىڭ تابىسىنىڭ سىرىن ءتۇسىنۋدىڭ قاجەتى جوق. وسى ۋاقىتقا دەيىن كوپتەگەن كەلىسىمدەر جاساپ، جۇزدەگەن ميلليون دوللار تاپتىم. ميللياردەر بولدىم. ءوز ءومىرىمدى ساراپتاي كەلە، مەن بارلىق ءساتتى كەلىسىمدەرگە كەزدەيسوق جاعدايدا تاپ بولعانىمدى ايتقىم كەلەدى. مەنىڭ جوبالارىم ماعان تانىستار، دوستار ارقىلى كەزدەستى. ءبارى كەزدەيسوق بولىپ جاتتى. كەزىندە مەن «اليانس بانكتى» دە، «ك-mobile-دى» دا، «بيتەلدى» دە سولاي كەزدەيسوق ساتىپ الدىم. مەن بارلىعىن ءوز تاجىريبەمنەن ايتىپ وتىرمىن.
ءار بيزنەسمەننىڭ باستى قاسيەتى - پروبلەمانى شەشە الۋ قابىلەتى. بۇل داۋسىز نارسە.
ءوز-ءوزىڭىزدى دامىتۋ ءۇشىن ەڭ دۇرىسى - قاتەلىكتەردى زەردەلەۋ جانە ولاردى قالاي شەشۋ كەرەك ەكەنىن ويلاستىرۋ.
پروبلەما الەم، قوعام، ەكونوميكا قوزعالىستا بولعاندىقتان پايدا بولا بەرەدى. سوعان ساي ەكونوميكادا، قورشاعان ورتامىزدا وزگەرىستەر ورىن الادى. بىزگە دە سول وزگەرىستەر اسەر ەتەدى. ءبىزدى جايلى ورنىمىزدان قوزعالتادى. ءبىز سول كەزدە پروبلەمامەن بەتپە-بەت كەلەمىز. سوندىقتان پروبلەما ءسىز ءتىرى تۇرعاندا بىتپەيدى. سىزدە ماقسات بولسا، سىزدە پروبلەما بولادى. ال ماقساتىڭىزدان باس تارتساڭىز، پروبلەما جوعالادى. پروبلەمانى شەشۋدىڭ ەڭ وڭاي جولى - ءوز امبيتسياڭىز بەن ماقساتىڭىزدان باس تارتۋ.
پروبلەما ەكى نارسەدەن تۇرادى: بەلگىلەرى مەن سەبەپتەرى. پروبلەمانىڭ بەلگىلەرى ءسوز، ەموتسيا، ءتۇرلى جاعدايلار ارقىلى بىلىنەدى. سىزگە ءبىر قىزمەتكەر كەلىپ: «ماكە، بىزدە پروبلەما»، - دەيدى. بۇل پروبلەما ەمەس، بۇل قىزمەتكەر ارقىلى كەلگەن پروبلەمانىڭ سيمپتومى. ال سەبەبى نەدە؟ سوندىقتان، كەز-كەلگەن پروبلەمانى «سيمپتوم» دەپ اتاڭىز. ويتكەنى ونىڭ ارعى سەبەبىن قازۋ كەرەك ەكەنىن تۇسىنەسىز. پروبلەما اياقاستى پايدا بولمايدى. ول اۋرۋ سياقتى. پروبلەمانى شەشۋدىڭ ءبىر جولى - بارلىق جاۋاپكەرشىلىكتى وزىڭىزگە الۋ. ەگەر ءسىزدىڭ پروبلەماڭىزعا قىزمەتكەرىڭىز نەمەسە باقسا بىرەۋ كىنالى بولسا سىزدە ول پروبلەمانى شەشۋگە ستيمۋل بولمايدى. ويتكەنى ءوزىڭىزدى كىنالى سانامايسىز.
مەنىڭ قولعا العان ىستەرىمنىڭ ىشىندەگى ەڭ ءساتسىز شىققاندارى مەنىڭ جان-تانىممەن جاقسى كورىپ، قالاپ العان جوبالارىم. بۇل عاشىقتىق سەزىمى سياقتى باسىڭدى اينالدىرادى. سەنى شىدامسىزدىق باسادى، بارلىق كەمشىلىكتەرگە كوز جۇما قارايسىڭ، سول جوباعا قاتىستى وتە وپتيميستىك كوزقاراس ۇستاناسىڭ. سەن بۇل جوبا تۋرالى قيالداپ كەتەسىڭ. ونى تەزىرەك قولعا العىڭ كەپ تۇرادى. ءسويتىپ، بۇل جوبا سەنىڭ تۇبىڭە جەتەدى.
وسى ورايدا، شاريعاتتا «ەگەر مەنىڭ قۇلىم وسى ومىردە بيلىككە، اتاق پەن اقشاعا قۇمار بولسا، مەن بۇل دۇنيەدە وسى نارسەلەردى ودان قاشىپ جۇرەتىندەي ەتەمىن. ال، ەگەر مەنىڭ قۇلىم و دۇنيەنىڭ يگىلىگىن ءبىرىنشى كەزەككە قويسا، وندا مەن وسى دۇنيەنىڭ بار يگىلىگى سونىڭ ارتىنان جۇگىرەتىندەي ەتەمىن» دەلىنگەن.
ەڭ قىزىعى، مەن بەيجاي قاراعان، ماعان الۋىمدى ءوتىنىپ قويماي قويعان، ءوزىم باس تارتقان جوبالار وتە ۇلكەن تابىس اكەلدى.
جوسپارسىز بارلىق ءىس- ارەكەت بوسقا كەتەدى. ەگەر ءسىز ماڭىزدى ىستەردى جوسپارلاماساڭىز، وندا سول ۋاقىتتىڭ ىشىندە ماڭىزى جوق ىستەردى جوسپارلاعانىڭىزبەن بىردەي. جوسپارلانعان ءىستىڭ پايداسى ون ەسە كوپ. ەگەر اياقاستى كەزدەسۋ شىقسا، مەن ءبىرىنشى جوسپارىما قارايمىن.
مەنىڭ ۇستانىمىم - باقىتتى ءومىر ءسۇرۋ، قوعامعا پايدالى بولۋ، قورشاعان ورتاعا پايدالى بولۋ.
