سەمەيدە 1944-جىلى جاسالعان تانكى استانادا جەڭىستىڭ 70 جىلدىعىنا ارنالعان پارادقا قاتىسادى
اتالعان تانك استانادا جەڭىستىڭ 70 جىلدىعىنا ارنالعان پارادقا قاتىسادى.
بىرنەشە اي بۇرىن جەتكىزىلگەن اسكەري ماشينانى بەس ادامنان تۇراتىن جاس ماماندار بريگاداسى قايتا جوندەۋدە. ولار قوزعالتقىش پەن بەرىلىس قورابىن قالپىنا كەلتىرىپ، ەڭ كۇردەلى پروتسەستەردى ورىندادى.
بريگادا ءۇشىن نەگىزگى ماسەلە - قوسالقى بولشەكتەردىڭ بولماۋى.
«بۇل تانك وزدىگىنەن استانادا ۇلى جەڭىستىڭ 70 جىلدىعىنا ارنالعان پارادتا ءجۇرىپ ءوتۋى ءتيىس. بۇگىندە تاۋىپ الۋ قيىنعا سوققان ونىڭ كەيبىر سايماندارىن ءبىز ءوزىمىزدىڭ ستانوكتارىمىزدا دايىنداپ جاتىرمىز. جوندەۋدەن باسقا بالالار قازىر ينتەرنەت ارقىلى تانكىنىڭ سوعىس جىلدارى قاي جەرلەرمەن جۇرگەنىن انىقتاماق»، - دەدى كاسىپورىننىڭ باسقارۋشى ديرەكتورى، گەنەرال نيكولاي پوسپەلوۆ.
قيىندىقتارعا قاراماستان، بۇل ءىستى قولعا العاندار ونى جىلدىڭ سوڭىنا دەيىن اياقتاۋدى جوسپارلاپ وتىر. اسكەري ماشينانىڭ كورپۋسىنداعى نومىرلەر ارقىلى ونىڭ 1944-جىلى جاساپ شىعارىلعانىن انىقتاۋ مۇمكىن بولدى. سوڭعى جىلدارى تانك استاناداعى تۇعىرلاردىڭ بىرىندە تۇرعان.
