ب ۇ ۇ باس اسسامبلەياسىنىڭ سەسسياسىنا 193 مەملەكەتتىڭ دەلەگاتتارى قاتىسپاق
سەسسيا اياسىندا بەلگىلى ساياسي قايراتكەر نەلسون ماندەلانىڭ قۇرمەتىنە ارنالعان بەيبىتشىلىك سامميتى دە وتەدى. سونداي- اق ب ۇ ۇ باس فورۋمىنىڭ كۇن تارتىبىندە ەسىرتكىمەن كۇرەس، تۋبەركۋلەز دەرتىن جويۋ جانە قاۋىپسىز ميگراتسيا بويىنشا جاھاندىق كەلىسىمشارتتى جۇزەگە اسىرۋ ماسەلەلەرى تالقىلانادى.
قاۋىپسىزدىك كەڭەسىندە ا ق ش پرەزيدەنتى دونالد ترامپتىڭ توراعالىعىمەن يران بويىنشا ءماجىلىس وتكىزىلەدى. ب ۇ ۇ جانىنداعى قازاقستاننىڭ تۇراقتى وكىلدىگىندە ا ق ش بيزنەس وكىلدەرىن جيناۋ جوسپارلانعان. ەلىمىز وتكىزەتىن باستى شارا - لاڭكەستىكتەن ازات الەمگە جەتۋ تۋرالى ءتارتىپ كودەكسىن ۇسىنۋى بولماق. بۇل قۇجات نۇرسۇلتان نازاربايەۆتىڭ باستاماسىمەن جاسالعان بولاتىن.
قايرات وماروۆ، ب ۇ ۇ جانىنداعى قازاقستاننىڭ تۇراقتى وكىلى:
- الداعى سەسسيادا قازاقستان دەلەگاتسياسى جۇمىسىنىڭ باستى تاقىرىپتارى بىتىمگەرشىلىك، قارۋسىزدانۋ مەن يادرولىق قارۋدى تاراتپاۋ، بىرىككەن ۇلتتار ۇيىمىن رەفورمالاۋ، لاڭكەستىك پەن ەسىرتكىگە قارسى كۇرەس بولماق. سونداي- اق تۇراقتى دامۋ ماسەلەلەرىن دە قاراستىرامىز. ەلباسىنىڭ تاپسىرماسى بويىنشا، قازاقستان دەلەگاتسياسى بىرىككەن ۇلتتار ۇيىمى باس اسسامبلەياسى كۇن تارتىبىندەگى نەگىزگى ساۋالدارىن تالقىلاۋعا بەلسەندى تۇردە قاتىسىپ وتىر.
www.24.kz
