عالي ورمانوۆتىڭ 1939-جىلعى كۇندەلىگى تابىلدى
عالي ورمانوۆ جەتىسۋ ولكەسىندە، قازىرگى الماتى وبلىسىنىڭ قاپال اۋدانىنا قاراستى ەشكى ولمەس تاۋىنىڭ باۋىرىندا دۇنيەگە كەلگەن. ول قازاق ادەبيەتىنە 20- جىلداردىڭ سوڭعى شيرەگىندە كەلگەن، ورىستىڭ، شىعىستىڭ كلاسسيكالىق ۇلگىلەرىن اۋدارىپ، قازاق ادەبيەتىنىڭ اۋدارما سالاسىندا دا ۇلەس قوسقان.
1939-1945-جىلدار ارالىعىندا جامبىل جابايەۆقا ادەبي حاتشىلىق قىزمەت اتقارعان. كوپتەگەن ولەڭدەر جيناعىنىڭ، بىرنەشە پوەما، اڭگىمە جانە وچەركتەردىڭ اۆتورى اتانعان.
اقىننىڭ جيەن-نەمەرەسى ايدار قىرىقباي ۇلىنىڭ سوزىنشە، كۇندەلىك شامامەن 1939-جىلى جازىلعان.
«كۇندەلىك لاتىن الىپبيىمەن جازىلعان. سول كۇيى ساقتالىپ، جازۋى وزگەرمەگەن. بۇگىندە سول كۇندەلىك جازىلعان ءالىپبيدى بىلەتىن ادامدار از ەكەن. سوندىقتان كۇندەلىكتى جاڭارتتىق. الداعى ۋاقىتتا اۋدارۋعا بەرەمىز. كۇندەلىكتىڭ مازمۇنى بويىنشا جامبىل جابايەۆقا كىمدەر كەلگەن، قانداي ماسەلەلەر تالقىلانعان دەگەن مالىمەت كورسەتىلگەن. كۇندەلىك ەش جەردە جارىق كورمەگەن. سوندىقتان جامبىل اتامىزدىڭ شىعارماشىلىعىن زەرتتەۋگە سەپتىگىن تيگىزەدى دەپ ويلايمىن»، - دەدى ا. قىرىقباي ۇلى كۇندەلىكتى عالي ورمانوۆتىڭ جارى ايتبالا ورمانوۆا ساقتاعان.
كەيىننەن كۇندەلىك اقىننىڭ قىزى جاميعا عالي قىزىنا تابىستالدى.
«ەلوردا مەكتەپتەرىنىڭ بىرىنە ع. ورمانوۆتىڭ ەسىمى بەرىلگەن. 2007-جىلدان بەرى اتالعان مەكتەپتىڭ الدىنا بيۋست ورناتۋ ماسەلەسى كوتەرىلىپ كەلەدى. قالا اكىمى باقىت سۇلتانوۆ بولعاندا بيۋجەتتەن عالي ورمانوۆتىڭ ءبيۋستىن ورناتۋ ماسەلەسى بەكىتىلگەن دە بولاتىن. وكىنىشكە قاراي، ءالى كۇنگە دەيىن مەكتەپ الدىنا بيۋست ورناتىلمادى»، - دەيدى ا. قىرىقباي ۇلى.
ايتا كەتەيىك، ع. ورمانوۆ قىرعىز ەپوسى «ماناستىڭ» 1-كىتابىن، ا. س. پۋشكيننىڭ، م. يۋ. لەرمونتوۆتىڭ، يان راينيستىڭ، ف. ماقتىمق ۇلىنىڭ ءبىرقاتار پوەمالارىن، ن. ۆ. گوگولدىڭ «نيەۆا پروسپەكتىسى» پوۆەسىن، ا. پ. چەحوۆتىڭ اڭگىمەلەرىن، م. تۇرسىن-زادەنىڭ «ءۇندىستان باللادالارى» ولەڭ كىتابىن، ل. ن. تولستويدىڭ «اننا كارەنينا» رومانىن قازاق تىلىنە اۋدارعان. الماتى وبلىسىنىڭ اكىمى اماندىق باتالوۆتىڭ قولداۋىمەن عالي ورمانوۆ اۋدارعان ل. ن. تولستويدىڭ «اننا كارەنينا» رومانىنىڭ 2 تومدىعى جارىق كورەدى.
