وڭتۇستىك كورەيا كارىستەرى قازاقتارعا 1937 -جىلعى قامقورلىعى ءۇشىن العىس ايتتى - فوتو
فورۋمدى قازاقستاننىڭ كورەي قاۋىمداستىعى جانە الماتى قالاسىنداعى كورەيا رەسپۋبليكاسىنىڭ باس كونسۋلدىعىنىڭ قولداۋىمەن ءال-فارابي اتىنداعى قازاق ۇلتتىق ۋنيۆەرسيتەتى (قاز ۇ ۋ) مەن جاھاندىق كورەي قورى ۇيىمداستىردى، دەپ حابارلايدى قازاقپارات ءتىلشىسى.
اتالعان جاھاندىق كورەي قورى ەۋروپا، ازيا، سولتۇستىك امەريكا مەن اۆستراليا ەلدەرىندەگى جەتەكشى جوعارى وقۋ ورىندارىندا 17 فورۋم ۇيىمداستىرعان. شارانىڭ پلەنارلىق جانە سەكتسيالىق وتىرىستارىندا ءبىرقاتار تاقىرىپتارمەن بىرگە «1937 -جىلعى كۇشتەپ جەر اۋدارۋ تۋرالى تاريحي ەستەلىك» تاقىرىبى كەڭ تالقىلاندى. 
قازاقستان مەن كورەيا قارىم- قاتىناسىن ءسوز ەتكەن شىعىس ازياداعى بەيبىتشىلىك ماسەلەلەرى بويىنشا حالىقارالىق كونفەرەنتسيا كوميتەتىنىڭ ءتوراعاسى لي بۋ ياڭ قازاقتارعا زور العىس ءبىلدىردى.
«قازاق حالقى وسىدان 80 جىل بۇرىن، 1937 -جىلى كۇشتەپ جەر اۋدارىلعان كورەيلەرگە اتامەكەنىنەن قونىس بەرىپ، قولتىعىنان دەمەپ، قول ۇشىن بەردى. ءال-فارابي اتىنداعى قاز ۇ ۋ باستاماسىمەن ۇيىمداستىرىلىپ جاتقان فورۋم دا قازاقتاردىڭ قوناقجايلىعىنىڭ ءبىر بەلگىسى»، - دەدى ول.
فورۋمدى اشقان قاز ۇ ۋ رەكتورى عالىم مۇتانوۆ قازاقستانداعى ۇلتتاردىڭ مىزعىماس دوستىعى مەن بىرلىگى ەلىمىزدىڭ وراسان زور جەتىستىگى ەكەنىن باسا ايتتى. «قازاق جەرىنە جەر اۋدارىلعانىنا بيىل 80 -جىل تولعان كورەي دياسپوراسىنىڭ قازاقستان حالقىنىڭ تاتۋ جانۇياسىندا وزىندىك ورنى بار. قازاقستاندىق كورەيلەر كورەي تۇبەگى مەن ەۋرازيا كونتينەنتى اراسىنداعى تۇراقتى كوپىر ءرولىن اتقارادى»، - دەدى ول.
ايتا كەتەيىك، 23 -شىلدە كۇنى رەسەيدىڭ ۆلاديۆوستوك قالاسىنان كارىستەردىڭ جەر اۋدارىلعانىنا 80 جىل تولعان وقيعانى اتاپ وتۋگە ارنالعان «ەستەلىك پويىزى» شىقتى. ول پويىز وسىدان 80 جىل بۇرىن كۇشتەپ جەر اۋدارىلعان ون مىڭنان استام كورەي كەلىپ قونىستانعان ۇشتوبە قالاسىنا 1 -تامىز كۇنى جەتكەن بولاتىن. الماتىدا وتكەن فورۋمعا «ەستەلىك پويىزىنىڭ» 80 گە جۋىق قاتىسۋشىسى كەلدى. دەلەگاتسيا وكىلدەرى ۇشتوبەگە جاقىن بوستوبە جوتاسىندا ورنالاسقان مەموريالدى كەشەندە جەر اۋدارىلعان كورەيلەردى ەسكە الۋ كەشىن وتكىزىپ، قولداۋ كورسەتكەن قازاق حالقىنا ريزاشىلىقتارىن ايتتى.
اۆتور: الماس مۇقاش ۇلى
