الماتىداعى 1904 - جىلدارى سالىنعان شىركەۋ كۇردەلى جوندەۋدەن وتەدى

 بۇل تۋرالى بۇگىن روجدەستۆو مەرەكەسى قارساڭىندا وتكىزىلگەن ارنايى باسپا ءسوز ءماسليحاتىندا استانا جانە قازاقستان ميتروپوليتى الەكساندر ءمالىم ەتتى.

 «بيىل الماتىداعى اۋليە- ۆوزنەسەنسكي كافەدرالدىق شىركەۋىنىڭ ورىس پراۆوسلاۆيالىق شىركەۋى الماتى ەپارحياسى قاراماعىنا قايتارىلعانىنا 20 جىل تولادى. ول 1995 - جىلى قايتارىلدى. سوندا ەلباسى نۇرسۇلتان نازاربايەۆ: «مەن ەلىمىزدىڭ بارلىق پراۆوسلاۆيا ازاماتتارىنا سىيلىق جاساماقپىن. ەندى بۇدان 70 جىل بۇرىن كەڭەس ۇكىمەتى تارتىپ العان الماتىداعى كافەدارلدىق سوبور قازاقستانداعى پراۆوسلاۆيالىق شىركەۋگە ماڭگىلىك قولدانىسقا بەرىلەدى»، دەگەن بولاتىن.

مىنە، وسى تاريحي ۋاقيعاعا بيىل 20 جىل تولادى. مەرەيتوي قارساڭىندا سوبورعا كۇردەلى جوندەۋ جۇرگىزىلەدى. وتكەن جىلدىڭ سوڭىندا ارنايى قور قۇرىلدى. قازىر بۇل ماسەلە قالالىق اكىمدىكتىڭ، مادەنيەت جانە سپورت مينيسترلىگىنىڭ قاتىسۋىمەن شەشىلىپ جاتىر. بيىل، كوكتەم شىعىپ، كۇن جىلىعان شاقتا كۇردەلى جوندەۋ جۇمىستارى باستالادى. وعان عىلىمي مەكەمەلەر، ماماندار تارتىلادى. جوندەۋ جۇرگىزىلگەنىمەن سوبوردا قۇلشىلىق ەتۋ راسىمدەرى جالعاسا بەرەتىن بولادى»، - دەدى ميتروپوليت الەكساندر.

ايتا كەتەلىك، اتالعان شىركەۋ ساۋلەتشى اندرەي زەنكوۆتىڭ جوباسى بويىنشا 1904-1907 - جىلدارى سالىنعان. ونىڭ ءبىر ەرەكشەلىگى قۇرىلىسىنا بىردە ءبىر شەگە قولدانىلماعان. سوندىقتان دا، ول ساۋلەت ونەرىنىڭ تاماشا تۋىندىسى سانالادى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى