قازاقستان توعىز ايدا مۇناي ەكسپورتىنان 19,2 ميلليارد دوللار تاپتى
سوڭعى 2 جىلدا قارا التىن ەكسپورتى ازايعانىمەن، 2017-جىلدىڭ 9 ايىنىڭ قورىتىندىسى بويىنشا قازاقستاننىڭ شيكى مۇنايىنا سۇرانىس 37 پايىزعا ارتتى، دەپ حابارلايدى «قازاقپارات» ح ا ا finprom.kz سايتىنا سىلتەمە جاساپ.
اقپارات كوزىنىڭ مالىمەتىنشە، قازاقستان قازىرگى تاڭدا داعدارىس الدىنداعى كورسەتكىشكە جەتۋ ءۇشىن مۇناي ەكسپورتىن ارتتىرا تۇسكەن. بيىلعى جىلدىڭ 9 ايى ىشىندە شەتەلگە 50,7 ميلليون توننا شيكى مۇناي مەن شيكى مۇناي ونىمدەرى ساتىلعان. وسىلايشا، كومىرسۋتەك ەكسپورتى وتكەن جىلمەن سالىستىرعاندا 7,6 پايىزعا ارتىپ، ەكى جىلدىق تومەندەۋ كەزەڭىنە نۇكتە قويىلدى.
قازاقستاندىق مۇنايدى ساۋدالاۋدان تۇسكەن پايدا دا ارتىپ كەلەدى. بيىلعى جىلدىڭ قاڭتار-قىركۇيەك ارالىعىندا قارا التىننىڭ ەكسپورتىنان قازاقستاننىڭ بيۋدجەتىنە 19,2 ميلليارد دوللار تۇسكەن. 2016-جىلدىڭ سايكەس كەزەڭىمەن سالىستىرعاندا بۇل كورسەتكىش 36,6 پايىزعا ارتىق ەكەنىن ايتا كەتۋ كەرەك.
مۇناي باعاسىنىڭ 27 پايىزعا قىمباتتاعانىن ەسكەرسەك، جىل باسىنداعى باسەڭدىككە قاراماستان قازاقستاننىڭ قارا التىنىنا دەگەن بۇرىنعى سۇرانىستىڭ قايتا قالپىنا كەلگەنىن اڭعارۋعا بولادى.
ەسكە سالا كەتسەك، 2017-جىلدىڭ العاشقى توقسانىندا قازاقستان تەك 15,9 ميلليون توننا شيكى مۇنايدى سىرتقا ساتىپ، قارا التىننىڭ سوڭعى 6 جىلدا ەڭ از مولشەرى ساۋدالانعانى تىركەلگەن ەدى.
ءبىر جىل ىشىندە قازاقستاننىڭ مۇنايىن ساتىپ الۋشىلاردىڭ «ۇشتىگىندە» وزگەرىستەر بولدى، شۆەيتساريانىڭ ورنىن فرانتسيا باسىپ وتىر. ناقتىراق ايتقاندا، فرانتسيالىق كومپانيالار بيىل 2,1 ميلليارد دوللاردىڭ مۇنايىن ساتىپ الىپ، 2016-جىلدىڭ قاڭتار-قىركۇيەك ارالىعىنداعى كورسەتكىشپەن سالىستىرعاندا 69,6 پايىزعا ارتىق ساۋدا جاساعان. بۇعان قوسا، فرانسيا ساتىپ الاتىن قارا التىننىڭ باعاسى 28 پايىزعا قىمباتتاعان بولاتىن.
نارىقتا ەڭ ءىرى ساتىپ الۋشى بۇرىنعىداي - يتاليا. سوڭعى 9 ايدا ول مەملەكەت 6,2 ميلليارد دوللاردىڭ 16 ميلليون توننا مۇنايىن ساتىپ العان. ال قىتاي نەگىزگى سەرىكتەس ەل بولعانىمەن، قازاقستاندىق قارا التىنعا دەگەن سۇرانىستى باسەڭدەتىپ كەلەدى. بيىل اسپان استى ەلى 567,7 ميلليون دوللاردىڭ مۇنايىنا تاپسىرىس بەرگەن. بۇل وتكەن جىلدىڭ سايكەس كەزەڭىمەن سالىستىرعاندا 7,2 پايىزعا از.
