پاۆلوداردان 18 توننا الما وڭتۇستىككە قايتارىلدى
بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز جيىنىندا ا ش م ا و ك م ي ك پاۆلودار وبلىستىق اۋماقتىق ينسپەكسياسى باسشىسىنىڭ ورىنباسارى ارمان شۇيكەنوۆ ءمالىم ەتتى.
«وسىمدىكتەر كارانتينى ينسپەكتورالارىمەن وبلىستىڭ فيتوسانيتاريالىق قاۋىپسىزدىگىن قامتاماسىز ەتۋ ماقساتىندا كارانتينگە جاتقىزىلعان ونىمدەردىڭ تاسىمالداۋ تارتىبىنە سايكەس كارانتيندىك باقىلاۋ جۇرگىزىلەدى. اعىمداعى جىلدىڭ ماۋسىم ايىنىڭ 26 سى كۇنىندەگى جاعداي بويىنشا جىل باسىنان بەرى كارانتيندىك زەرتحاناعا 630 كارانتينگە جاتقىزىلعان ءونىم ۇلگىسى كەلىپ تۇسكەن. 742 زەرتحانالىق اناليز جۇرگىزىلىپ، 474 فيتوسانيتارلىق ساراپتاما قورىتىندىسى بەرىلگەن. جالپى، وبلىس ىشىندە تاسىمالداناتىن، يمپورتتالاتىن جانە ەكسپورتتالاتىن ونىمدەر تەكسەرىلەدى، دەدى ارمان شۇيكەنوۆ.
سپيكەردىڭ ايتۋىنشا، يمپورت بارىسىندا وڭىرگە اكەلىنگەن 4064 توننا استىق داقىلدارى، 2120 توننا كوكەنىس ونىمدەرى، 95 توننا جەمىس زەرتحانالىق تەكسەرۋدەن وتكەن. ناتيجەسىندە يمپورتتالعان وىنمدەردەن كاليفورنيالىق سىمىر كارانتيندىك نىسانى جانە مونيتورينگتىك زەرتتەۋ بارىسىندا 3 جاتاعان ۋكەكىرەنىڭ جاڭا وشاعى انىقتالدى.
«راحمەت» بازارىنا وڭتۇستىك وڭىردەن جەتكىزىلگەن المادان كاليفورنيالىق سىمىر انىقتالدى. بۇل جاعداي مامىر ايىنىڭ باسىندا تىركەلدى. تاسىمالداۋشى اكىمشىلىك جاۋاپكەرشىلىككە تارتىلىپ، 30 ا ە ك مولشەرىندە ايىپپۇل سالىندى. زيانكەس انىقتالعان 18 توننا الما كەرى قايتارىلدى»، - دەيدى پاۆلودار وبلىستىق اۋماقتىق ينسپەكسياسى باسشىسىنىڭ ورىنباسارى.
جالپى، 2019 -جىلى كارانتينگە جاتقىزىلعان ونىمدەردى تاسىمالداۋدا فيتوسانيتارلىق تالاپتاردى بۇزعانى ءۇشىن جانە فيتوسانيتارلىق شارالاردى جۇرگىزۋ بارىسىندا 59 جەكە جانە زاڭدى تۇلعالارعا 1 ميلليون 616 مىڭ تەڭگە اكىمشىلىك ايىپپۇل سالىنىپ، وندىرىلگەن. سونىمەن قاتار، بيىل وبلىستىڭ شەكارا اۋماقتارىندا 5 فيتوسانيتارلىق باقىلاۋ بەكەتتەرىن قۇرۋ بويىنشا جۇمىس جاسالعان. بەكەتتەردى ماتەريالدىق-تەحنيكالىق جابدىقتاۋ ءۇشىن قاجەتتى جابدىقتار جانە 5 دانا اۆتوكولىك، 5 جىلى جىلجىمالى تۇرعىن ۆاگوندار ساتىپ الىندى.
فيتوسانيتارلىق باقىلاۋ بەكەتتەرى وبلىستىڭ 4 شەكارالاس اۋداندارىندا ورنالاستىرىلادى. سونىڭ ىشىندە شارباقتى اۋدانىندا «شارباقتى» بەكەتىندە، ۋسپەن اۋدانىندا «نايزا» جانە «قوساق» بەكەتتەرىندە، جەلەزين اۋدانىندا «ءۇرلى- توبە» بەكەتىندە، ەرتىس اۋدانىندا «امانگەلدى» بەكەتىندە اشىلادى. اتالعان بەكەتتەر وبلىس اۋماعىندا ەكسپورت جانە يمپورتتالاتىن كارانتينگە جاتقىزىلعان ونىمدەردىڭ فيتوسانيتارلىق باقىلاۋ جۇرگىزۋىن تولىق قامتاماسىز ەتەدى.
