قازاقستاندىق جاس شاحماتشىلار ازيا چەمپيوناتىندا 18 مەدال جەڭىپ الدى
تۋرنيرگە الەمنىڭ 23 ەلىنەن 572 سپورتشى قاتىستى، دەپ حابارلايدى قازاقپارات ق ر شاحمات فەدەراتسياسىنا سىلتەمە جاساپ.
توعىز تۋردان سوڭ كلاسسيكالىق شاحماتتا ءبىرىنشى ورىن الماتىلىق ديماش تۋلەندينوۆكە بۇيىردى، كۇمىس مەدالدى قىزىلوردادان نازەركە نۇرعالي جەڭىپ الدى، ال اتىراۋلىق زارينا نۇرعالييەۆا، شىمكەنتتەن زەينەپ سۇلتانبەك جانە دە وڭتۇستىك استانانىڭ وكىلدەرى الۋا نۇرمانوۆا مەن كسەنيا بالابايەۆا چەمپيوناتتىڭ قولا جۇلدەگەرى اتاندى.
«جاستار كەرەمەت ويىن كورسەتتى. بيىل مەدالدار سانى وتكەن جىلمەن سالىستىرعاندا ەكى ەسە كوپ ەكەنىن ايتا كەتكەن ءجون» ، - دەيدى بالالار مەن جاسوسپىرىمدەر قۇراماسىنىڭ جاتتىقتىرۋشىسى انۋار يسماعامبەتوۆ.
سونداي- اق، راپيد پەن بليتس تۋرنيرلەرىنىڭ ناتيجەسى بويىنشا قازاقستاندىقتار 8 التىن، 2 كۇمىس جانە 2 قولا مەدال جەڭىپ الدى. كلاسسيكا تۋرنيرىندەگى بارلىق جەڭىمپازدار ءوز دارەجەلەرىن فيدە شەبەرىنە ۇمىتكەرگە دەيىن كوتەردى.
«بالالاردىڭ شري- لانكاداعى ناتيجەلەرى جاستار اراسىنداعى شاحماتتىڭ كوتەرىلىپ كەلە جاتقانىن كورسەتتى. يۋنيورلار اراسىنداعى جاسى ۇلكەندەرى كوپ ۇزاماي رەسپۋبليكانىڭ اتىنان ەرەسەكتەر اراسىنداعى تۋرنيرلەرگە قاتىسادى» ، - دەيدى قازاقستان شاحمات فەدەراتسياسىنىڭ اتقارۋشى ديرەكتورى يرينا گريشەنكو.
چەمپيوناتتا جاس سپورتشىلار شاحماتتىڭ كلاسسيكا، راپيد جانە بليتس پارتيالارىندا جارىستى. تۋرنيردە جاس جىگىتتەر مەن قىزدار التى جاس ساناتى بويىنشا باق سىنادى: 8, 10, 12, 14, 16 جانە 18 جاسقا دەيىن.
