الماتىدا 18 جاستاعى قىز جۇمباق جاعدايدا جوعالىپ كەتتى

رەداكسياعا حابارلاسقان بويجەتكەننىڭ تۋىسقاندارى قىزدارىنىڭ جوعالعانى تۋرالى حابارلاۋدى ءوتىندى. ءارىپ نازەركە سوڭعى رەت تۇزدىباستاۋ اۋىلىنداعى ۇيىنەن 10 -شىلدە كۇنى تۇسكى 14:00-15:00 شاماسىندا شىعىپ كەتكەن. سودان ۇيىنە قايتىپ ورالماعان.

قازىرگى تاڭدا مەدەۋ اۋداندىق ءى ءى ب ءارىپ نازەركەگە ىزدەۋ جاريالادى. تەلەفون قوڭىراۋلارى دەتاليزاتسياسىنىڭ مالىمەتتەرى بويىنشا نازەركە سوڭعى رەت گۋريلەۆ 27 مەكەنجايىندا 40 مينۋتتاي وتىرعان. كەيىن تۇنگى 23:00 شاماسىندا ايشا ءبيبى 356 مەكەنجايىندا بولعان. اتالعان مەكەنجايدا شاعىن ءدامحانا مەن اۆتوجۋۋ ورنى بارى انىقتالدى.

سوڭعى رەت نازەركەنى تۇنگى 12:00 مەن 1:00 شاماسىندا ءدامحانا قىزمەتكەرلەرى كورگەن. ولاردىڭ ايتۋىنشا، قىز جىلاعان كۇيى جول بويىنا جۇگىرىپ شىققان. سودان بەرى ەشكىمنىڭ كوزىنە تۇسپەدى. جاقىندارى نازەركەنىڭ نەلىكتەن حابارلاسپاي جاتقانىنا دال بولىپ وتىر.

ول بيىل مەكتەپ ءبىتىرىپ، ۇ ب ت- دان جاقسى بالل جيناعان. بويجەتكەن قالاعان وقۋىما تۇسەمىن دەپ ۇمتىلىپ وتىرعان.

«ۇيدە ەشقانداي ۇرىس-كەرىس داۋ جانجال بولعان جوق. ءتىپتى ۇرىسقان كۇننىڭ وزىندە مىنە ءۇشىنشى كۇن قاتارىنان جوعالىپ وتىر. حابارلاساتىن ەدى عوي. دوستارى تۇگەل ىزدەسىپ جاتىر. جامان ادەتتەرى جوق. مۇلدە بەيحابارمىز. ونى كورگەن- بىلگەن ادام بولسا حابارلاسسىنشى، وتىنەمىز»، - دەدى اپكەسى دانا راقىم.

قازىرگى تاڭدا نازەركەنى ىزدەۋ جۇمىستارىمەن مەدەۋ اۋداندىق ءى ءى ب اينالىسىپ جاتىر. ال وتباسى مۇشەلەرى مەن تۋىسقاندارى، جاناشىر ادامدار ايشا ءبيبى كوشەسىنىڭ ماڭىنداعى تاۋ- تاس، وزەن- كولدەردىڭ اراسىن ءتىنتىپ جاتىر.

اۆتور: گۇلميرا عوسمان-ءالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى