قازاقستان پرەزيدەنتى ەل حالقىنىڭ 18 ميلليونعا جەتكەنىن رەسمي جاريالاماق
بۇل تۋرالى بۇگىن ەلورداداعى تاۋەلسىزدىك سارايىندا ءوتىپ جاتقان دۇنيەجۇزى قازاقتارىنىڭ V قۇرىلتايىندا قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.
وتكەن 20- عاسىر قازاق ءۇشىن قيامەتكە تولى، وتە اۋىر جىلدار بولدى. 1921، 1930-جىلدارداعى اشتىقتىڭ سالدارىنان قازاقتىڭ تەڭ جارتىسىنان ايىرىلدىق. بىرىنشىسىندە - 30 پروتسەنتتەن، ەكىنشىسىندە جارتىسىنان ايىرىلىپ قالدىق. ەگەر دە سونداي وپات بولماعاندا قازىر ەلىمىزدەگى قازاقتىڭ سانى 50-60 ميلليوننان اسىپ جىعىلاتىن ەدى. ودان كەيىن، رەپرەسسيادا 103 مىڭ ادام سوتتالدى. قازاقتىڭ 65 مىڭ بەتكە ۇستار زيالىسى تۇتقىنعا ءتۇستى، ونىڭ 25 مىڭى اتىلدى. قازاقتى باسقاراتىن ءبىلىمى بار، قازاق ءۇشىن ءسوز ايتا الاتىن ادامنىڭ بارلىعىنىڭ تامىرىنا بالتا شاۋىپ، جويىپ تاستادى. سوعان قاراماستان قازاق وركەندەپ، قايتادان ءوسىپ كەلەدى»، - دەدى ەلباسى.
ق ر پرەزيدەنتىنىڭ ايتۋىنشا، بۇگىندە 5 ميلليون قازاق شەتەلدە تۇرىپ جاتىر. شەتەلدەن 1 ميلليونعا جۋىق قانداستارىمىز، باۋىرلارىمىز ەلگە كوشىرىلىپ الىندى، ولارعا قولدان كەلەر بارلىق كومەك كورسەتىلدى.
جىل سايىن 30-50 مىڭعا جۋىق قانداسىمىز كوشىپ كەلەدى. كەلگەن اعايىنداردىڭ ىشىندە كوپتەگەن تانىمال عالىمدار، دارىندى سپورتشىلار، ونەر مايتالماندارى دا بار.
مىسالى بوكسشى قانات يسلام، ءانشى مايرا مۇحامەد قىزى، عالىم قارجاۋباي سارتقوجا ۇلى، دۇكەن ءماسىمحان سىندى كوپتەگەن ازاماتتار كەلىپ، ەلدىڭ مەرەيىن وسىرۋدە، ءوزىنىڭ ونەرىن، بىلىمدەرىن شىڭداپ جاتىر.
«سونىمەن بىرگە بۇل كەلگەن قانداستارىمىز ەلدەگى دەموگرافيالىق جاعدايعا دا ۇلەس قوستى، حالىق سانىنىڭ وسۋىنە ەرەكشە ىقپال ەتتى. ەگەر دە 1991- جىلى، تاۋەلسىزدىك جاريالانعان كەزدە قازاقتىڭ ۇلەسى 40 پروتسەنتتەن اسار-اسپاس بولاتىن. قازىر 70 پروتسەنتتەن استى»، - دەدى مەملەكەت باسشىسى.
ەلباسى تاۋەلسىزدىك العان كەزدە حالقىمىزدىڭ 17 ميلليون بولعانىن، الايدا ءتۇرلى تاريحي جاعدايمەن ەلىمىزگە قونىستانعان باسقا ۇلت وكىلدەرى وزدەرىنىڭ اتا مەكەنىنە كوشىپ كەتىپ، 14 ميلليون بولىپ قالعانىمىزدى ايتتى.
«قۇدايعا شۇكىر قازىر جاعدايدىڭ جاقسارۋىنا بايلانىستى ەلىمىز كوبەيىپ كەلەدى. ەگەر دە باستاپقى كەزدە 200 مىڭنان استام بالا دۇنيەگە كەلەتىن بولسا، قازىر جىل سايىن 400 مىڭنان ارتىق ءسابي دۇنيە ەسىگىن اشادى. 1- شىلدەدە ءبىزدىڭ حالقىمىز 18 ميلليون بولدى دەپ جاريالايمىن»، - دەدى ن. نازاربايەۆ.
