پاۆلوداردا 18 -عاسىرداعى ەسكى اقشالار كورمەگە قويىلدى
شاراعا پاۆلودار قالاسى №5-ورتا مەكتەبى، پاۆلودار اۋدانى ميچۋرين بالالار ءۇيى مەن روزوۆ ورتا مەكتەبىنىڭ، كاچير اۋدانىنىڭ فەدەروۆ جانە بەرەگوۆوي ورتا مەكتەپتەرى مۇعالىمدەرىنىڭ قولىمەن جينالعان قازاقستاننىڭ جانە باسقا دا ورتا ازيا مەملەكەتتەرىنىڭ قۇندى قاعازدارى قويىلدى. سونىمەن قاتار، ونىڭ ىشىندە اباي قۇنانباي ۇلى، مۇحتار اۋەزوۆ، شوقان ءۋاليحانوۆ، ىبىراي التىنسارين سىندى ۇلى تۇلعالارىمىزدىڭ سۋرەتتەرى بەينەلەنگەن مەرەيتويلىق مونەتالار دا بار.
«ميچۋرين بالالار ءۇيىنىڭ مۇراجايىنا مۇنداي قۇندى جادىگەرلەردى 2003 -جىلدان جيناي باستادىق. ءبىزدىڭ قورىمىزدا قازاقتىڭ كوپتەگەن قۇندى جادىگەرلەرى ساقتالعان. بۇگىنگى كورمەگە قازاقستان تاۋەلسىزدىك العاننان كەيىنگى اينالىمدا بولعان اقشالاردىڭ بارلىق ءتۇرىن الىپ كەلىپ وتىرمىز. سونىمەن قاتار، كەڭەس وداعى كەزىندەگى جانە ءۇندىستان، يران، امەريكا، گەرمانيا سىندى الىپ ەلدەردىڭ ەرتە كەزدە قولدانعان تەمىر تيىندارىن ۇسىنىپ وتىرمىز، - دەيدى ميچۋرين بالالار ءۇيىنىڭ تاربيەشىسى ايجان احمەتشارىپوۆا.
18 -عاسىردا ءى پەتر پاتشانىڭ تۇسىندا قولدانىلعان ورىس تيىنىن پاۆلودار قالاسىنداعى №5-ورتا مەكتەپتىڭ تاريح ءپانىنىڭ مۇعالىمى ۆيكتور ستولياروۆ الىپ كەلگەن. «مەن ەرتە كەزدەگى رەسەي يمپەرياسى، قازاقستان رەسپۋبليكاسى جانە ورتا ازيا مەملەكەتتەرىنىڭ مونەتالارى مەن قاعاز اقشالارىن جيناستىردىم. مۇنداعى ەڭ ەسكى مونەتا 13-عاسىرعا تيەسىلى. ال، ەڭ ەسكى اقشا I پەتر پاتشانىڭ تۇسىندا، ياعني 1721 -جىلى جارىققا شىققان. وسىنداي تاريحي زاتتاردى بۇگىن ەل تاۋەلسىزدىگىنىڭ 25 جىلدىعىنا وراي ۇيىمداستىرىلعان كورمەدە وقۋشىلارعا كورسەتۋدى ءجون سانادىق»، - دەيدى ۆيكتور ستولياروۆ.
ايتا كەتەرلىگى، كورمە «ۇلى دالا ەلى - تاۋەلسىزدىكتىڭ 25 نەگىزى» 25 جۇلدىزدى كۇن» اكسياسى شەڭبەرىندە ۇيىمداستىرىلدى. كورمەنى قالا مەكتەپتەرىنىڭ وقۋشىلارى تاماشالاۋدا.
