جىل باسىنان بەرى 18 قازاقستاندىق سپورتشى دوپينگپەن ۇستالعان
ولاردىڭ قاتارىندا مەلدوني پرەپاراتىن قولدانعاندار دا بار. بۇل تۋرالى «ازاتتىققا» رەسپۋبليكالىق دوپينگكە قارسى ۇلتتىق ورتالىق مالىمدەدى.
«2016-جىلى قازاقستاندىق سپورتشىلاردان 960 دوپينگ سىناما الىنىپ، تىيىم سالىنعان پرەپاراتتاردى قولدانۋعا قاتىستى 18 وقيعا انىقتالدى. قازاقستان سپورتشىلارى اراسىندا مەلدوني پرەپاراتىن قولدانعانى ءۇشىن سپورتتىق جاتتىعۋ جۇمىستارىنان شەتتەتىلگەن سپورتشىلار بار» دەلىنگەن ۇلتتىق ورتالىقتىڭ ازاتتىققا بەرگەن رەسمي جاۋابىندا.
ۇلتتىق ورتالىق دوپينگپەن ۇستالعان 18 سپورتشىنىڭ ەسىمىن اتاۋدان باس تارتقان.
مەلدوني 2016-جىلدىڭ 1- قاڭتارىنان رۇقسات ەتىلمەگەن پرەپاراتتار تىزىمىنە ەنگىزىلگەن. WADA (حالىقارالىق انتيدوپينگ اگەنتتىگى) جىل باسىنان بەرى الەمدە 288 سپورتشى مەلدوني پرەپاراتىن قولدانعانىن مالىمدەدى. بۇل پرەپاراتتى قولدانعاندار قاتارىندا الەمنىڭ ەكس-ءبىرىنشى راكەتكاسى، رەسەيلىك تەننيسشى ماريا شاراپوۆا بار.
رۋسلان مەدەلبەك
