بەس جىلدا قازاقستاننىڭ كەدەن وداعى ەلدەرىمەن تاۋاراينالىمى 18 پايىزعا ءوستى

بۇل تۋرالى بۇگىن قر ۇەم حالىقارالىق ەكونوميكالىق ىقپالداستىق دەپارتامەنتىنىڭ ديرەكتورى ەرنار باكەنوۆ ءمالىم ەتتى.

«2010-جىلدان بەرى قازاقستاننىڭ كەدەندىك وداق ەلدەرىمەن تاۋاراينالىمى 18 پايىزعا ءوستى. ەگەر العاشقى ەكى جىلدى الاتىن بولساق، 2010- جانە 2011-جىلدارى تاۋاراينالىمنىڭ كولەمى قارقىندى بولدى. كەدەندىك شەكارالاردىڭ اشىلۋى قاتتى اسەر ەتسە كەرەك، جىلىنا 35-40 پايىزعا ءوسىم كورسەتىپ وتىردى»، - دەپ اتاپ ءوتتى ول استانادا تىلشىلەرگە بەرگەن سۇحباتىندا.

دەپارتامەنت باسشىسىنىڭ ايتۋىنشا، 2012-2013-جىلدارى ونىڭ قارقىنى ءسال باسەڭدەپ، جىلىنا 18-20 پايىز دەڭگەيىندە تىركەلدى.

«كەيىن ول تۇراقتاندى. ىقپالداستىقتىڭ العاشقى اسەرلەرى اياقتالعاندىعىن ەسكەرەتىن بولساق، تاۋاراينالىم ەداۋىر وسكەن جانە بەلگىلى ءبىر دەڭگەيگە كوتەرىلدى. دەگەنمەن جىلىنا 2-3 پايىزعا ءوسىپ كەلەدى»، - دەيدى ول.

الايدا، ە. باكەنوۆتىڭ ءسوزى بويىنشا، سوڭعى ءبىر جارىم جىلدا قازاقستاننىڭ تاۋاراينالىمى تومەندەي باستاعان.

«بۇنىڭ باستى سەبەبى - قازاقستاننىڭ باستى ەكسپورتتىق تاۋارلارىنىڭ باعالارى قۇلدىراۋىنان بولىپ وتىر. ەگەر قازاقستاننىڭ ءۇشىنشى مەملەكەتتەرمەن تاۋاراينالىمى 37 پايىزعا تومەندەسە، ە ا ە و ەلدەرى اراسىنداعى تاۋاراينالىم 29 پايىزعا قۇلدىراپ كەتتى»، - دەپ ءتۇيدى ءسوزىن ە. باكەنوۆ.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى