ارنايى ۇيرەتىلگەن ءيت قازاقستانعا وتپەك بولعان 18 جاستاعى بويجەتكەننىڭ ءىش كيىمىنەن ەسىرتكى تاپتى
«9 - قاڭتاردا تاڭعى ساعات 09.50-دە ەسىرتكى تاسىمالداۋشى ۇستالدى. پويزدى تەكسەرۋ كەزىندە كريستينا ەسىمدى نەبارى 18 جاستاعى قىز بالانىڭ ماڭىنان ارنايى ۇيرەتىلگەن ءيت اينالشىقتاپ، جانىنان شىقپاي قويعاندىقتان جەكە تەكسەرۋ جاسالدى. تەكسەرۋ بارىسىندا ونىڭ ءىش كيىمىنە تىگىلگەن، سالماعى 15 گرامم «گاشيش» ەسىرتكىسى تابىلدى. ول جەلىلىك پوليتسيا بولىمشەسىنە تاپسىرىلدى»، - دەپ حابارلادى باسپا ءسوز قىزمەتىندەگىلەر.
سونىمەن قاتار، ۆەدومستۆو وكىلدەرىنىڭ مالىمەتىنشە، «سەمەي» شەكارالىق باقىلاۋ وتريادىنىڭ «شەمونايحا تەمىرجول بولىمشەسىندە 7 - قاڭتار كۇنى تاعى دا ءبىر ەسىرتكى تاسىمالداۋشىنى ۇستاعان. "ساعات تاڭعى 05.30-دا شەكاراشىلار "لەنينوگورسك - استانا" باعىتىمەن كەتىپ بارا جاتقان № 376 جولاۋشىلار پويىزىن تەكسەرۋ بارىسىندا ارنايى ۇيرەتىلگەن "ميلا" اتتى قىزمەتتىك ءيت №10 ۆاگوننىڭ №4 ورنىنان، جاستىقتىڭ تىسىنا تىعىلعان "گاشيش" ەسىرتكىسىن تاۋىپ الدى. ورىن يەسى ۇستالدى، ول 41 جاستاعى قازاقستاندىق ەكەن. ۇستالعان ازامات شەمونايحا تەمىرجول بەكەتىنىڭ جەلىلىك پوليتسيا بولىمىنە تاپسىرىلدى. تابىلعان ەسىرتكى زاتىنىڭ كولەمى مەن سالماعى اسا كوپ ەمەس، بار- جوعى 89 گرامم عانا. دەگەنمەن، بۇل قازاقستاندىق شەكاراشىلاردىڭ قىراعىلىعىن تاعى ءبىر كورسەتسە كەرەك"، - دەلىنگەن حابارلامادا.
ايتا كەتەيىك، ەسىرتكى تاسىمالداۋشىلاردى ۇستاۋدان سوڭعى كەزدەرى قوستاناي شەكارا وتريادىنىڭ "قايراق اۆتو" بولىمشەسى الدا كەلەدى. بۇگىن تۇندە، ساعات 03.30-دا وسى بولىمشەنىڭ شەكارا ناريادى "رۋدنىي - ەكاتەرينبۋرگ" باعىتىمەن كەتىپ بارا جاتقان جولاۋشىلار اۆتوبۋسىن تەكسەرۋ كەزىندە № 41-42 ورىنداردىڭ ۇستىندەگى سورەدەن "ماريحۋانا" ەسىرتكىسىن تاپتى. بۇل ەسىرتكىنىڭ يەسى رەتىندە تاعى دا 18 جاستاعى، ءبىراق بۇل جولى قازاقستاندىق بوزبالا جىگىت ۇستالدى. سالماعى 3-4 گرامم عانا بولعانىمەن، اينالاعا قاۋىپ- قاتەرى وراسان- زور ەسىرتكى زاتى يەسىمەن بىرگە قارابالىق اۋداندىق ىشكى ىستەر بولىمىنە تاپسىرىلدى.
