كەلىمبەتوۆ: قازاقستاندىقتار 18 ميلليارد دوللاردى ۇيىندە ۇستاپ وتىر

«سوڭعى ۋاقىتتاعى ۇيالى تەلەفون ارقىلى SMS- شابۋىلدار اسەر ەتىپ، قازاقستاندىقتاردىڭ باسىم بولىگى جيعان قارجىلارىن ۇيلەرىنە ۇستاي باستادى. مەن بىرەۋلەرگە ءومىر ءسۇرۋ جايىندا اقىل ايتقىم كەلمەيدى. ءبىراق قارجىنى ۇيدە ۇستاعان وتە قاۋىپتى. بۇل قىلمىستىق ىستەردىڭ بولۋىنا جول بەرەدى. 18 ميلليارد دوللاردىڭ قازاقستان اۋماعىندا ۇيدە ساقتالۋى تىم قاۋىپتى جاعداي» - دەدى كەلىمبەتوۆ.

1-قىركۇيەكتەن باستاپ كاپيتالعا كەشىرىم جاساۋ مەرزىمى باستالعانىن ەسكەرتكەن باس بانكير حالىققا قولدا بار قارجىنى بانكتەگى ەسەپشوتقا سالۋدىڭ قاۋىپسىز ەكەنىن قۇلاققاعىس جاسادى.

«جيناعان قارجىنى بانكتە ساقتاۋدىڭ قاۋىپسىز ەكەنىن اشىپ ايتقىم كەلەدى. قارجىنىڭ 50 پايىزىن دوللارمەن جانە ەۆرومەن، ال 50 پايىزىن تەڭگەمەن ساقتاعان ءتيىمدى. تەڭگە كۇندەلىكتى ومىردە قاجەت بولعاندىقتان وسىلاي ەتۋ دۇرىس. شىندىعىن ايتقاندا قارجىنى ۇيدە ساقتاۋ ەشقانداي كىرىس اكەلمەيدى. سوندىقتان ءوز باسىم قارجىنى بانكتە ساقتاعان دۇرىس دەپ ەسەپتەيمىن» - دەدى كەلىمبەتوۆ.

بۇعان قوسا ول - سوڭعى ەكى كۇندە مۇناي باعاسىنىڭ الەمدىك نارىقتا ءبىرىنشى مارتە 100 دوللاردان تومەن بولعانىن، ايتا كەلە «ەگەر نارىقتا مۇناي باعامى 80 دوللار بولسا، وندا رەسەي ءرۋبلى 43 تەڭگەنى قۇرايدى. مىنە، سوندا مازاسىزدانۋعا بولادى. ال ازىرگە قاۋىپتەنەتىندەي ەش نەگىز جوق. مۇناي باعامى تۇراقتى» - دەدى.

Tengrinews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى