اتى-شۋلى 1889 - جىلى بولعان شەلەك جەر سىلكىنىسى وشاعىندا جاڭا زەرتتەۋ ورتالىعى سالىنادى

بۇل تۋرالى بۇگىن الماتىدا حالىقارالىق «وڭتۇستىك جانە ورتالىق ازياداعى سەيسمولوگيا مەن سەيسميكالىق قۇرىلىس سالاسىنداعى وڭىرلىك ىنتىماقتاستىق» اتتى سەمينار بارىسىندا قازاقستانداعى «سەيسمولوگيا ينستيتۋتى» ج ش س-نىڭ ديرەكتورى تاڭاتقان اباقانوۆ مالىمدەدى.

ونىڭ ايتۋىنشا، اتالمىش ورتالىقپەن قاتار، ەلىمىزدە سەيسميكالىق باقىلاۋلاردى كەڭەيتۋ ماقساتىندا تاعى دا 52 جاڭا سەيسميكالىق ستانسا اشۋ جوسپارلانىپ وتىر.

«سەيسميكالىق ۇدەرىستەردى زەرتتەۋ جانە قۇرىلىس نىساندارىنىڭ سەيسميكالىق بەرىكتىگىن تەكسەرۋ ماقساتىندا الماتى وبلىسىندا حالىقارالىق سەيسميكالىق تاجىريبە ورتالىعىن، ياعني بۇكىل ءبىر پوليگون اشۋ جوسپارلانعان. بۇل پوليگون الماتىدان 150 شاقىرىم جەردە، 1889 - جىلى ورىن العان اتى-شۋلى شەلەك جەر سىلكىنىسى وشاعىندا سالىنادى دەپ جوسپارلاپ وتىرمىز» - دەدى ءوز سوزىندە ت. اباقانوۆ.

سونداي-اق، «سەيسمولوگيا ينستيتۋتى» ج ش س ديرەكتورى ينستيتۋت اياسىندا تار كولەمدى مامانداردىڭ دا دايارلاناتىندىعىن جەتكىزدى.

«مىسالى، ءبىز جەر سىلكىنىستەرىنىڭ بيولوگيالىق «جارشىلارى»، ياعني جانۋارلار، جاندىكتەر جانە وسىمدىكتەردى زەرتتەپ، باقىلايتىن ماماندار دايارلايمىز. مۇنداي جۇمىس باسقا ەش جەردە جاسالىنبايدى. ءبىزدىڭ ماماندار ءتىپتى جىل قۇستارىنىڭ دا مىنەز-قۇلىقتارىن زەرتتەۋمەن اينالىسادى. قىتايلىق سەيسمولوگتار دا قازىر وسى سالانى جانداندىرا باستادى. ال بىزدە مۇنداي بيولوگيالىق ستانسالار تۇراقتى تۇردە جۇمىس ىستەپ جاتىر»، - دەدى ت. اباقانوۆ

ايتا كەتەلىك، بۇگىن الماتىدا اقش باس كونسۋلى تەرەزا گرەنچيكتىڭ قولداۋىمەن «وڭتۇستىك جانە ورتالىق ازياداعى سەيسمولوگيا مەن سەيسميكالىق قۇرىلىس وبلىسىنداعى وڭىرلىك ىنتىماقتاستىق» اتتى سەمينار وتۋدە.

ونداعى باستى ماقسات - سەيسمولوگيا مەن سەيسميكالىق قۇرىلىس سالاسىندا ەڭبەك ەتەتىن عالىمدار مەن ينجەنەرلەردىڭ باسىن قوسۋ. ءوزارا تاجىريبە الماسۋ جانە جەر سىلكىنىسىن بولجاۋ مەن ونىڭ سالدارىن باسەڭسىتۋ سالاسىنداعى ادىستەمەلەردى جەتىلدىرۋ جولدارىن تالقىلاۋ.

ءۇش كۇنگە سوزىلاتىن باسقوسۋعا وڭتۇستىك جانە ورتالىق ازيادان، ەۋروپا مەن ا ق ش-تان 80 نەن استام عالىمدار مەن ينجەنەر ماماندار قاتىسۋدا.

سەمينار ءالى ءوز جۇمىسىن جالعاستىرۋدا.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى