قازاقستاندا 180 مىڭ مۇعالىم بىلىكتىلىگىن ارتتىرۋ كۋرسىنان وتەدى
ءمينيستردىڭ ايتۋىنشا، 2015 - جىلدىڭ 1 - قىركۇيەگىنەن باستاپ ەنگىزىلەتىن ءبىلىم بەرۋدىڭ جاڭا ستاندارتى مۇعالىمدەردىڭ بىلىكتىلىگىن ارتتىرۋدىڭ جاڭا تالاپتارىن ەنگىزۋدى قاجەت ەتەدى.
«ءبىلىم بەرۋ سالاسىن جاڭا ستاندارتقا كوشىرۋ ۇستازداردىڭ بىلىكتىلىگىن ارتتىرۋ جۇيەسىن دە جاڭعىرتۋدى تالاپ ەتەدى. قازىرگى تاڭدا ق ر ب ع م باستاۋىش سىنىپ مۇعالىمدەرىنىڭ بىلىكتىلىگىن ارتتىرۋدىڭ جاڭا باعدارلاماسىن جاساپ جاتىر. ازىرگە 180 مىڭ مۇعالىمنىڭ بىلىكتىلىگىن ارتتىرۋ كوزدەلىپ وتىر. جوعارى سىنىپ مۇعالىمدەرىنىڭ بىلىكتىلىگىن ارتتىرۋ جوباسى كەيىن كەزەڭ- كەزەڭىمەن جۇزەگە اسىرىلاتىن بولادى» ، - دەدى مينيستر.
مينيستر الماتىنىڭ ەلىمىزدىڭ بىرەگەي ءبىلىم جانە عىلىم ورداسى رەتىندە كوشباسشى بولىپ وتىرعاندىعىن اتاپ ءوتتى. ونىڭ ايتۋىنشا، وڭتۇستىك استانا مەكتەپتەرىندە مۇعالىمدەردىڭ 30 پايىزىنىڭ بىلىكتىلىگى جوعارى. بۇل رەسپۋبليكا بويىنشا ۇزدىك كورسەتكىش.
قالا باسشىسى احمەتجان ەسىموۆ قالاداعى ءبىلىم بەرۋ ءىسىنىڭ ءبىرقاتار وزەكتى ماسەلەلەرى مەن جاڭا وقۋ جىلىنا بەلگىلەنگەن مىندەتتەردى اتاپ ءوتتى. اتاپ ايتقاندا، بيىلعى وقۋ جىلىندا باستى باسىمدىق جالپى ءبىلىم بەرۋ مەكتەپتەرىندەگى ءبىلىم بەرۋ جۇيەسىن نازاربايەۆ زياتكەرلىك مەكتەبىنە بەيىمدەۋ، ءبىلىم بەرۋ ساپاسىن ارتتىرۋ، مەكتەپكە دەيىنگى ءبىلىم بەرۋمەن بالالاردى 100 پايىز قامتۋ ماسەلەلەرىنە بەرىلمەك.
اۆتور: گۇلميرا عوسمانالي
