18 جاستاعى قازاقستاندىق بويجەتكەن ۋەلس حانشايىمى ديانانىڭ ماراپاتىن يەلەندى
لوندون. قازاقپارات - 18 جاستاعى ديانا مۋرزاعاليەۆا ەرەكشە الەۋمەتتىك كۇش- جىگەرى ءۇشىن ۋەلس حانشايىمى ديانانىڭ اتىنداعى ماراپاتقا يە بولدى.
ۋەلس حانشايىمى ديانانى ەسكە الۋ ءۇشىن تاعايىندالعان بۇل ماراپات ونىمەن اتتاس قايىرىمدىلىق قورىنىڭ اتىنان بەرىلەدى. وعان حانشايىمنىڭ ەكى ۇلى، جوعارى كورولدىك مارتەبەلى ۋەلس حانزاداسى جانە حانزادا گارري، ساسسەكس گەرتسوگى دەمەۋشىلىك تانىتادى.
ديانا مۋرزاعاليەۆا سويلەۋ قابىلەتىنىڭ بۇزىلۋىنا جانە دەنساۋلىعىنا بايلانىستى قيىندىقتارعا تاپ بولعاندارعا قولداۋ كورسەتىپ كەلەدى. سەمەي پوليگونىندا ونداعان جىلدار بويى جۇرگىزىلگەن يادرولىق سىناقتاردىڭ سالدارىنان ديزارتريا دەرتىنە شالدىققان ديانا بىرنەشە رەت وتا جاساتىپ، تالاي سىناق پەن قيىندىققا قارسى ءتۇرعان. بالا كەزىندە سويلەي الماعان ول ءوز ويىن جازۋ ارقىلى جەتكىزىپ، كەيىننەن مۇمكىندىگى شەكتەۋلى بالالاردىڭ ارماندارى تۋرالى اڭگىمە قۇراستىرعان. وسى وقيعالار ونىڭ «ءۇمىت ءاردايىم جانىمىزدا» انيماتسيالىق فيلمىنە نەگىز بولدى.
ينكليۋزيۆتى اكادەميانىڭ نەگىزىن قالاعان جانە سويلەۋ قابىلەتى بۇزىلعان ادامدارعا ارنالعان جاساندى ينتەللەكتپەن جۇمىس ىستەيتىن SPEAKUP قولدانباسىن جاساعان ول ءبىلىم، تەحنولوگيا جانە اڭگىمەلەۋ ارقىلى جاھاندىق ينكليۋزياعا جاڭا دەم بەرگەن.
«ديانا» ماراپاتىنىڭ باس ديرەكتورى، دوكتور تەسسي ودجو CBE ديانا مۋرزاعاليەۆانى ماراپاتىمەن قۇتتىقتادى.
- ءبىز ۋاقىتىن وڭ وزگەرىستەر جاساۋعا ارناعان دۇنيە جۇزىندەگى ديانا ماراپاتىنىڭ جاڭا جەڭىمپازدارىن شىن جۇرەكتەن قۇتتىقتايمىز. ءبىز بۇل ماراپاتتى جەڭىپ العان ادامداردىڭ جاستاردى قاۋىمداستىقتارعا قاتىسۋعا شابىتتاندىراتىنىن بىلەمىز، - دەدى ول.
ديانا ماراپاتى كىمدەرگە بەرىلەدى؟
«ديانا» ماراپاتىنىڭ بارلىق جەڭىمپازى كەم دەگەندە 12 ايىن ۇگىت- ناسيحات جانە وقىتۋدان باستاپ، قاراجات جيناۋ مەن قىزمەت كورسەتۋگە ارناعان.
2024 -جىلى 30 دان استام ەلدەن 80 نەن اسا ۆولونتەر توپتارعا جينالدى. ءاربىر نوميناتسيا بەس نەگىزگى كريتەري بويىنشا قاراستىرىلىپ، باعالاندى. ولار: كوزقاراس، الەۋمەتتىك اسەر، بوزگەلەردى شابىتتاندىرۋ، جاستار اراسىنداعى كوشباسشىلىق جانە الەۋمەتتىك ارەكەت جولى.
قازىلار القاسى كەمىندە ءۇش تورەشىدەن، ونىڭ ىشىندە ءبىر جاستار وكىلىنەن قۇرالادى.
ايتا كەتەيىك، 2024 -جىلعى ديانا سىيلىعىنا 1700 دەن استام ءوتىنىم كەلىپ ءتۇستى.
