جولداۋ: 18 جاستان كەيىن الاتىن 3 مىڭ دوللارعا نە ساتىپ الۋعا بولادى؟
ونى بالالار 18 جاسقا تولعاندا ءبىراق الادى. «ۇلتتىق قور – بالالارعا» باعدارلاماسى 2024-جىلى باستالادى.
پرەزيدەنتتىڭ باسپا ءسوز حاتشىسى رۋسلان جەدەلبايدىڭ ايتۋىنشا، بالا 18 جاسقا تولعاندا، شوتىندا 3 مىڭ ا ق ش دوللارى جينالىپ قالادى. ازىرشە بۇل اقشانى كەيىن قايدا جانە قالاي جاراتۋعا بولاتىنى ناقتى ايتىلمادى. 18 جىلدان كەيىن بۇل سوماعا نە الۋعا بولاتىنى دا بەلگىسىز. Massaget.kz ءتىلشىسى مۇنداي سوما 18 جاستاعى بالاعا قازىرگى ۋاقىتتا بەرىلسە، 2022-جىلى نە الۋعا بولاتىنىن زەرتتەپ كوردى.
1- كۋرستىڭ اقىسىن تولەۋگە بولادى
ءدال قازىرگى باعاممەن ەسەپتەسەك، 3 مىڭ دوللار - 1421757 تەڭگە.
الدىمەن ەلىمىزدەگى كەي ۋنيۆەرسيتەتتىڭ وقۋ اقىسىن قاراپ كورەيىك. ءال-فارابي اتىنداعى قازاق ۇلتتىق ۋنيۆەرسيتەتىنىڭ 2022-2023-جىلداعى وقۋ جىلىنا ارنالعان وقۋ اقىسىن قاراپ شىقتىق. كوپتەگەن ماماندىقتا وقۋ اقىسى - ميلليون تەڭگە. «حالىقارالىق قارىم-قاتىناس» فاكۋلتەتىنە تۇسسەڭىز، 1300000 تەڭگە تولەيسىز.
گۋميليەۆ اتىنداعى ەۋرازيالىق ۇلتتىق ۋنيۆەرسيتەتتە بىلتىرعى وقۋ اقىسى 950 مىڭ مەن ميلليون اراسىندا بولعان.
ياعني، جينالعان اقشانى وقۋ اقىسىنا جاراتامىن دەسەڭىز، ۇلتتىق ۋنيۆەرسيتەتتەردە ءبىر كۋرستى عانا تولەي الاسىز.
قازاقستاندا 1,4 ميلليون تەڭگەنى العاشقى جارنا رەتىندە تولەپ، ءۇي الۋعا بولاتىن باعدارلاما جوق. «الماتى جاستارى» سەكىلدى باعدارلامالاردا العاشقى جارنا - 10 پايىز، ياعني 1,8 ميلليون تەڭگە. دەمەك، بالا شوتىنا جينالعان اقشانىڭ ۇستىنە تاعى 400 مىڭداي قوسۋ كەرەك.
ودان بولەك، بۇل سوماعا iPhone 13 سمارتفونىنىڭ ۇشەۋىن ساتىپ الۋعا بولادى. ونلاين دۇكەندەرگە قاراساق، بۇل سمارتفوننىڭ ەڭ ارزان نۇسقاسى - 445 مىڭ تەڭگە تۇرادى.
ەلدەگى تۋروپەراتورلار ۇسىنعان مالىمەتتەر بويىنشا، 1,4 ميلليون تەڭگەگە ەكى ادام بولىپ، ەكى رەت تۇركياعا بارىپ كەلۋگە بولادى. ءدال وسىلاي، مىسىر نە دۋبايعا دا ەكى رەتتەن بارا الاسىز.
11 مىڭ نان، 2,5 مىڭ ليتر ءسۇت
1,4 ميلليون تەڭگەمەن ستۋدەنتتەرگە ەڭ قاجەت زاتتاردى نەشە رەت الۋعا بولاتىنىن ەسەپتەيىك. مىسالى، الماتىدا جالدامالى ءبىر بولمەلى پاتەردىڭ ورتاشا باعاسى - 150 مىڭ تەڭگە. جينالعان سوماعا بىردەن 9 ايعا پاتەر اقىسىن تولەپ تاستاۋعا بولادى.
ەگەر قوعامدىق كولىكپەن جۇرەتىن بولساڭىز، 80 تەڭگە جولاقىسىمەن 17771 رەت اۆتوبۋسقا وتىرا الاسىز. ال ءوز كولىگىڭىز بولسا، 7811 ليتر اي-92 ماركالى جانارماي قۇيۋعا بولادى.
نە بولماسا، بۇل سوماعا 11847 نان الا الاسىز. 2585 ءسۇت نەمەسە 947 شۇجىق الۋعا بولادى. ودان بولەك، ۇيىڭىزگە 3754 كەلى كارتوپ اكەلۋىڭىزگە بولادى. نە بولماسا، 3 مىڭ كەلى ۇن، 361 كەلى ەت ساتىپ الا الاسىز.
1200 تەڭگەلىك دونەردى 1184 رەت جەۋگە بولادى. ءتورت كۋرس بويى، قارنىڭىز اشپايتىنى انىق. جالپى، تۇسكى اس پەن كەشكى اسقا كۇنىنە 3 مىڭ تەڭگە جۇمساپ وتىرساڭىز، 474 كۇن بويى قينالمايسىز.
بۇل سوماعا 1777 رەت اۋەزوۆ اتىنداعى قازاق ۇلتتىق دراما تەاترىنا بيلەت ساتىپ الۋعا بولادى. ودان بولەك، 947 رەت كينوعا بارىپ كەلە الاسىز.
ال دەنە شىنىقتىرامىن دەسەڭىز، فيتنەس-زالعا بىردەن 47 ايعا تولەپ تاستاۋعا بولادى.
1,4 ميلليون تەڭگەگە ستۋدەنت نە الا الادى؟
18 جاسقا تولىپ، 1-كۋرسقا تۇسكەلى جاتقان ستۋدەنت 1,4 ميلليون تەڭگەگە ەڭ كەرەكتەردەن نە الا الادى؟ ەسەپتەپ كورەيىك. الدىمەن، ستۋدەنتكە جاقسى سمارتفون كەرەك. سەنىڭىز، جاقسى سمارتفون الساڭىز، كەيىن وكىنبەيسىز. بۇعان 350 مىڭ تەڭگە جۇمسايىق. ال ونىڭ ماركاسىن ءوزىڭىز تاڭداپ الارسىز.
ودان كەيىن ستۋدەنتكە نوۋتبۋك تە وتە ماڭىزدى. كەرەك ساتىندە قاتىپ، قولايسىز ساتكە تۇسىرمەۋى ءۇشىن 250 مىڭ تەڭگەگە جاقسىراعىن الايىق.
كەيبىرى مۇمكىندىك بولسا پرينتەر دە ساتىپ الۋعا كەڭەس بەرەدى. سەبەبى ءتورت جىلدا تالاي رەت پرينتەرگە ءماجبۇر بولاسىز. وعان قاعاز جانە بوياۋلارىمەن بىرگە ورتا ەسەپپەن 100 مىڭ تەڭگە جۇمساڭىز.
ودان بولەك 15 مىڭ تەڭگەگە Power Bank پەن 5 مىڭ تەڭگەگە جاقسى فلەش-كارتا كەرەك.
ەلەكترساموكات. ارينە، بۇل مىندەتتى ەمەس. ءبىراق الماتىلىق جاستار قازىر كولىككە قاراعاندا ەلەكترساموكاتتاردى قۇپ كورەدى. سەبەبى قالادا ۆەلوجولدار سالىنىپ، كەپتەلىستەن قاشقاندار ەلەكترساموكات ءمىنىپ جاتىر. ونىڭ ۇستىنە تاكسي مەن قوعامدىق كولىككە دە اقشا قۇرتپايسىز. ەلەكترساموكاتتى قازىر 140 مىڭ تەڭگەگە ساتىپ الۋعا بولادى.
وسىنىڭ بارىنە بىزدە 860 مىڭ تەڭگە جۇمسالىپ تۇر. 200 مىڭ تەڭگەگە گاردەروبىڭىزدى تولىقتاي جاڭارتىپ الۋعا بولادى. Casual ستيلىندەگى كيىمدەر، ريۋكزاك، كەڭسە تاۋارلارى كەرەك. ودان بولەك، كەي ماماندىقتا قوسىمشا زاتتار، تەحنيكالار قاجەت بولۋى مۇمكىن.
ارينە، بۇل تەك ءبىزدىڭ توپشىلاۋىمىز. بالا 18 جاسقا تولعان سوڭ ەسەپشوتىندا جينالعان قاراجات وزىنە تىكەلەي بەرىلمەي، وقۋ ورنىنا نە پاتەر الاتىن بولسا، بانككە جىبەرىلۋى دە ابدەن مۇمكىن.
