ەلوردا پوليتسەيلەرى رەيد كەزىندە تاركىلەگەن ءدارى-دارمەكتەرىڭ قۇنى 17 ميلليون تەڭگەگە جۋىقتايدى
بۇل تۋرالى قازاقپارات ەلوردالىق پوليتسيا دەپارتامەنتىنە سىلتەمە جاساپ حابارلايدى.
قالانىڭ ورىنبور كوشەسىندە «فولكسۆاگەن» كولىگى توقتاتىلىپ، ونى تەكسەرۋ كەزىندە ىشىنەن قىتايدا جاسالعان «Lianhua» كاپسۋلالارىنىڭ 165 وراماسى انىقتالعان. بۇل پرەپاراتتى قازاقستان رەسپۋبليكاسىنىڭ اۋماعىندا پايدالانۋعا رۇقسات قۇجاتتار جوق. ۇستالعان جەرگىلىكتى تۇرعىن پرەپاراتتاردى سايتتاردىڭ بىرىنەن ساتىپ الىپ، ولاردى قالادا قايتا ساتپاق بولعانىن ايتتى.
دارىلىك زاتتاردىڭ قايدان شىققانى انىقتالۋ ۇستىندە. ەكىنشى وقيعادا يانۋشكيەۆيچ كوشەسىندە كوپشىلىككە تاپشى بولعان «پاراتسەتامول»، «ينگاۆيرين»، «دەكسامەتازون»، «تسەفترياكسون»، «ليدوكاين»، «ەۋفيلين»، «سۋمامەد»، «تسيپرولەت» سياقتى دارىلىك زاتتاردى ساتپاق بولعان قالانىڭ 33 جاستاعى تۇرعىنى ۇستالدى.
ءۇشىنشى وقيعادا پوليتسەيلەر زاڭسىز اينالىمنان 6500 ماسكانى تاركىلەدى. رەيدتەر جۇرگىزىلە باستاعاننان بەرى پوليتسيا دەپارتامەنتىنىڭ قىزمەتكەرلەرى مەديتسينالىق پرەپاراتتار مەن قورعانىش قۇرالدارىن زاڭسىز ساتۋدىڭ 38 فاكتىسىن انىقتادى. ونىڭ ىشىندە 455 وراما ءدارى-دارمەك، 239 600 ماسكا، سونداي-اق دەنە قىزۋىن ولشەيتىن قۇرالدار، قورعانىش كوستيۋمدەرى، قولعاپتار، مەديتسينالىق باس كيىم، كوزىلدىرىك، انتيسەپتيكالىق قۇرالدار جانە وزگە دە بۇيىمدار بار.
الىنعان مەديتسينالىق پرەپاراتتار مەن قورعانىش كيىمدەرىنىڭ جالپى سوماسى 16825985 تەڭگەنى قۇراعان.
ءاربىر انىقتالعان فاكتى بويىنشا قولدانىستاعى زاڭناماعا سايكەس قۇقىقتىق باعالاۋ بەرىلەدى. ەگەر سىزگە دارىلىك زاتتاردى ساتۋدىڭ فاكتىلەرى بەلگىلى بولسا، نۇر-سۇلتان قالاسىنىڭ پوليتسيا دەپارتامەنتىنە مىنا تەلەفوندار بويىنشا حابارلاسۋىڭىزدى سۇرايمىز: 87172716291، 716335، whatsapp 87476205793، نەمەسە «102».
