استانادا زاڭسىز ورناتىلعان 17 ۇيالى بايلانىس انتەنناسى الىندى
ولاردىڭ بارلىعىندا دا نورمادان اۋىتقۋشىلىق انىقتالماعان، دەپ حابارلايدى استانا اكىمدىگىنىڭ رەسمي سايتى.
«دەگەنمەن ەلەكتروماگنيتتىك ساۋلە تاراتۋدىڭ رۇقسات ەتىلگەن دەڭگەيى اسىرىلعان جانە رۇقسات قۇجاتتارىنىڭ جوقتىعى راستالعان جاعدايدا اكىمشىلىك ايىپپۇل سالۋ جانە ازاماتتاردىڭ دەنساۋلىعىنا قاۋىپ ءتوندىرۋى مۇمكىن جابدىقتى الىپ تاستاۋ بويىنشا شارالار قابىلدانادى»، - دەپ مالىمدەدى قالالىق قوعامدىق دەنساۋلىق ساقتاۋدى قورعاۋ دەپارتامەنتىندە.
«قالالىق قوعامدىق دەنساۋلىق ساقتاۋدى قورعاۋ دەپارتامەنتى Kcell, ALTEL، Beeline جانە باسقا دا ۇيالى بايلانىس وپەراتورلارىنىڭ قۇرىلعىلارىنان ەلەكتروماگنيتتىك ساۋلەلەردىڭ بولىنۋىنە ۇنەمى مونيتورينگ جۇرگىزىپ كەلەدى. 2018-جىلى ەلوردا تۇرعىندارىنىڭ ۇيالى بايلانىس انتەننالارى تۋرالى وتىنىشتەرىن تەكسەرۋ ناتيجەسىندە 17 ۇيالى بايلانىس انتەنناسى الىنىپ تاستالدى»، - دەپ دەپارتامەنت باسشىسى ءسادۋاقاس بايعابىلوۆ كوپ قاباتتى ۇيلەردىڭ شاتىرلارىنا ۇيالى بايلانىس انتەننالارىنىڭ ورناتىلۋىنا قاتىستى ەلوردا تۇرعىندارىنىڭ شاعىمدارىنا پىكىر ءبىلدىردى.
ۇيالى بايلانىس انتەننالارىنىڭ سانيتارلىق اۋماق ساقتالماي ورناتىلعان جاعدايدا، ادامداردىڭ دەنساۋلىعىنا كەرى اسەرىن تيگىزۋى مۇمكىن.
«مۇنىڭ سوڭى باس اۋرۋى، جۇرەك-قان تامىرلارى جۇيەسى اۋرۋلارىنا جانە گورمونالدى وزگەرىستەرگە دە اكەپ سوعۋى ىقتيمال. بالاباقشا، مەكتەپ جانە ينتەرنات عيماراتتارىنا انتەننالاردى ورنالاستىرۋعا تىيىم سالىنادى. ال تۇرعىن ءۇي جانە اكىمشىلىك عيماراتتاردىڭ شاتىرلارىنا 100 ۆتتان استام قۋاتى بار تاراتۋشى انتەننالاردى ورنالاستىرۋعا تىيىم سالىنعان»، - دەدى ءسادۋاقاس بايعابىلوۆ.
