تالدىقورعاندا 17 جاستاعى ستۋدەنت مەنينگيتتەن قايتىس بولدى
«ءيا، 17 جاستاعى ستۋدەنتتىڭ مەنينگوكوك ينفەكسياسىنان كوز جۇمعانىن راستايمىز. ناۋقاستىڭ اۋرۋى جەدەل تۇردە وتكەن. ول اۋرۋحاناعا جەتكىزىلگەندە جاعدايى وتە اۋىر بولعان. ستۋدەنتتىڭ ناقتى قاي وقۋ ورنىندا وقىعانى تۋرالى ازىرگە ناقتى اقپارات جوق»، - دەدى وبلىس اكىمىنىڭ باسپا ءسوز حاتشىسى عالىمۇرات جۇكەل.
سونداي-اق ع. جۇكەل ناۋقاس كەشە ساعات 18:30 شاماسىندا تالدىقورعانداعى كوپسالالى اۋرۋحانادا قايتىس بولعانىن ءمالىم ەتتى. ونىڭ سوزىنشە، ستۋدەنت وزگە ناۋقاستاردان وقشاۋلانعان.
ايتا كەتۋ كەرەك، بۇل مەنينگيت دەرتىن جۇقتىرىپ، ادام ولىمىمەن اياقتالعان تالدىقورعانداعى ەكىنشى جاعداي. بۇعان دەيىن قالادا 2 جاسار قىز بالا ينفەكسيالىق اۋرۋحانادا كوز جۇمعان بولاتىن. ال جالپى وبلىس بويىنشا اتالعان دەرتتەن 4- ادام كوز جۇمدى.
