قازاقستاندىقتار 17 مىڭ كولىكتى شەتەلدىكتەرگە «تەگىن» بەرە سالعان
وسى ۋاقىتقا دەيىن 43 مىڭ كولىك قايتارىلدى. قالعان 17 مىڭ كولىك ءالى تابىلماي جاتىر، دەپ حابارلايدى قازاقپارات ءتىلشىسى.
ق ر ىشكى ىستەر ءمينيسترىنىڭ ءبىرىنشى ورىنباسارى مارات دەمەۋوۆتىڭ ايتۋىنشا، قازىرگى كەزدە ول كولىكتەردى قايتارعان ءتيىمسىز. سەبەبى ءبىراز ۋاقىت ءوتىپ كەتتى. ۇرلانعان كولىكتەر توزدى. ايىپپۇل تۇراعىنان الۋ ءۇشىن قىرۋار اقشانى دا تولەۋگە تۋرا كەلەدى. سول سەبەپتى كولىك يەلەرى تەمىر تۇلپارلارىن ىزدەۋدى قويدى. ال ت م د بويىنشا كولىكتەردى ۇرلاۋعا قارسى كۇرەس تۋرالى كەلىسىمنىڭ ارقاسىندا قولدى بولعان ماشينالاردى جىلدام قايتارۋعا مۇمكىندىك بار.
«ماسەلەن، ءبىز ءوز جەرىمىزدە ۇرلانعان كولىكتى انىقتاساق، 20 كۇننىڭ ىشىندە كورشى ەلدەردىڭ ءتيىستى ورگاندارىنا حابار بەرەمىز. ولاردىڭ تەرگەۋ قىزمەتى 30 كۇننىڭ ىشىندە ءدال سول كولىكتەردىڭ ۇرلانعانىن راستاۋى ءتيىس. ءبىر ايدىڭ ىشىندە جاۋاپ كەلمەسە، ءبىز ول كولىكتى اۋكسيون ارقىلى ساتا الامىز. قازىرگى كەزدە قازاقستاندا ۇرلانعان 200 كولىك ت م د ايماعىندا ءجۇر. سونىڭ 66 سىن قايتاردىق»، - دەدى مەدەۋوۆ قازاقپارات تىلشىسىنە بەرگەن سۇحباتىندا.
ايتا كەتەيىك، بۇگىن سەناتورلار ت م د ەلدەرىنىڭ كولىكتەردى ۇرلاۋعا قارسى كۇرەس كەلىسىمىن راتيفيكاتسيالاۋ تۋرالى زاڭ جوباسىن تالقىعا سالدى. اتالعان قۇجاتتى ق ر ىشكى ىستەر ءمينيسترىنىڭ ءبىرىنشى ورىنباسارى مارات دەمەۋوۆ تانىستاردى. ونىڭ ايتۋىنشا، 2005 -جىلى ون ەلدىڭ باسشىلارى كەلىسىمگە قول قويعان بولاتىن. بەرتىن كەلە، ۋكراينا مەن گرۋزيا كەلىسىمنەن باس تارتى. وسى ۋاقىتقا دەيىن ونى 6 مەملەكەت راتيفيكاتسيالادى. ەندى، قازاقستان، تاجىكستان مەن ازەربايجان قالدى.
