حالقى 17 ميلليون عانا قازاقستاندى قانشا ادام باسقارىپ وتىر؟
راسىندا 17 ميلليون حالقى بار قازاقستاندى قانشا ادام باسقارىپ وتىر؟ ولار قانشا ايلىق الادى؟ NUR. KZ پورتالى ەلىمىزدەگى مەملەكەتتىك قۇرىلىمىن زەرتتەپ كوردى.
بىلتىر ب ا ق قازاقستاننىڭ مەملەكەتتىك قۇرىلىمدارىندا 100 مىڭعا جۋىق شەنەۋنىكتىڭ قىزمەت ەتەتىن جارىسا جازدى. قاراعاندىلىق بەلسەندى قوعام وكىلدەرى ولارعا جىل سايىن 600 ميلليارد تەڭگە جۇمسالاتىنىن ساناپ شىققان.
بۇل سومانىڭ حالىقتىڭ تولەپ جاتقان سالىعىنان الىناتىنىن ەسكەرسەك، وسىنشا شەنەۋنىك اسكەرى ەلگە پايدا ما، الدە شىعىن با؟
ايماق اكىمدىكتەرىنىڭ سايتىندا كورسەتىلگەندەي، ەلىمىزدەگى وبلىس باسشىلارىنىڭ بەس-بەستەن ورىنباسارى جانە ءبىر-ءبىر اپپارات باسشىسى بار.
مەملەكەتتىك بيۋجەت ەسەبىنەن قامتاماسىز ەتىلەتىندىكتەن، اكىمدەر مەن ونىڭ ورىنباسارلارىنىڭ ايلىق، جىلدىق تابىسى بارىنە اشىق اقپارات. بىلتىر ءبىرقاتار ءوڭىر باسشىلارى وزدەرىنىڭ ايىنا قانشا جالاقى الاتىنىن باسپا سوزگە دە جاريا ەتتى.
مىسالى، اقتوبە وبلىسىنىڭ باسشىلىعىن ايلىقپەن قامتاماسىز ەتۋ ءۇشىن مەملەكەت قازىناسىنان ايىنا 3 ميلليون 300 مىڭ تەڭگە قاراجات جۇمسالادى. بۇل سومانىڭ ىشىنە ونىڭ بەس ورىنباسارىنىڭ جالاقىسى كىرەدى. ەلىمىزدەگى وبلىس اكىمىنىڭ ورىنباسارلارى ورتا ەسەپپەن 500 مىڭ تەڭگە الادى.
قالا باسشىلىعىنىڭ قۇرىلىمى ءدال سولاي ويلاستىرىلعان. 900 مىڭ حالقى بار شىمكەنت قالاسىن اكىممەن بىرگە ونىڭ بەس قوسشىسى باسقارادى.
ەڭ قىزىعى، اۋدان باسشىلىعىندا دا وسى جاعداي.
13 مىڭ ادام تۇراتىن قوستاناي وبلىسىنداعى قامىستى اۋدانىن ءبىر اكىم مەن ونىڭ ءۇش ورىنباسارى باسقارادى. اكىمدىكتىڭ جۇمىسىن ۇيىمداستىراتىن اۋدان اكىمىنىڭ اپپارات باسشىسى تاعى بار.
سونداي-اق، قوعام بەلسەندىلەرى سوڭعى جىلدارى وبلىستارداعى باسقارۋ ورگاندارى - ۆەدومستۆولاردىڭ سانىنىڭ كۇرت وسكەنىن بايقاعان. قازىر ايماقتاردا 20 دان استام باسقارما جۇمىس جاسايدى.
نۇرسۇلتان نازاربايەۆتىڭ ءوزى دە ەلدەگى شەنەۋنىكتەر سانىنىڭ كوپتىگىمەن كۇرەسىپ كەلەدى. الايدا ولاردىڭ قىسقاراتىن ءتۇرى جوق.
مىسالعا ءبىر عانا مينيسترلىكتى قاراستىرىپ كورەيىك. تامارا دۇيسەنوۆا باسقاراتىن ەڭبەك جانە حالىقتى الەۋمەتىك قورعاۋ مينيسترلىگى 14 دەپارتامەنتتەن، 34 باسقارمادان تۇرادى ەكەن. وندا 191 ادام قىزمەت ەتەدى.
ەلىمىزدەگى مينيسترلىكتە قىزمەت ەتەتىن «ب» كورپۋسىنداعى مەملەكەتتىك قىزمەتكەرلەردىڭ قانشا جالاقى الاتىنى تۋرالى اقپاراتتى ەكى جىل بۇرىن ينۆەستيتسيا جانە دامۋ مينيسترلىگى Facebook الەۋمەتتىك جەلىسىندە جاريالاعان بولاتىن.
مىسالى، 2015-جىلى مينيسترلىكتەگى دەپارتامەنت ديرەكتورى ەڭبەك وتىلىنە قاراي ايىنا 175 مىڭنان 398 مىڭ تەڭگە ارالىعىندا جالاقى العان. ال ونىڭ ورىنباسارى رەسمي تۇردە 156 مىڭ مەن 212 مىڭ تەڭگەنىڭ كولەمىندە ايلىقتى مىسە تۇتقان. باسقارما باسشىلارى - 118 مىڭنان 160 مىڭ تەڭگە ارالىعىندا، ال باس ساراپشى - 106 مىڭنان -143 مىڭ تەڭگەگە دەيىن جالاقىعا قىزمەت ەتكەن.
2015-جىلى ەلباسى اتالعان دارەجەدەگى مەملەكەتتىك قىزمەتكەرلەردىڭ ايلىعىنا جىلىنا %15 ۇستەمە اقشا قوساتىنىن، سودان كەيىنگى جىلى، ياعني 2017-جىلى تاعى %15 عا كوتەرۋ تۋرالى ۋادە ەتكەن.
كوپتەگەن ەلدەردە شەنەۋنىكتەردىڭ جالاقىسى ەڭبەك ءوتىلى ەمەس، ولاردىڭ قىزمەتىنىڭ ناتيجەسىنە بايلانىستى بەكىتىلەدى. مىسالى ۇلى بريتانيا مەن جاڭا زەلانديادا وسىنداي جۇيە قالىپتاسقان.
