ق ر ادىلەت مينيسترلىگى 17 ميللياردتان استام سوماعا مەملەكەت مۇددەسىن قورعاعان
دەپ حابارلايدى «قازاقپارات» ح ا ا ءتىلشىسى.
ءمينيستردىڭ مالىمدەۋىنشە، سوڭعى 13 جىلدا ق ر ادىلەت مينيسترلىگى اربيتراجدى جانە شەتەلدىك سوتتاردا رەسپۋبليكا مۇددەلەرىن 17 ميلليارد 400 ميلليون ا ق ش دوللارىنا قورعاعان.
«بىلتىر لوندون قالاسىنىڭ جوعارى ادىلەت سوتى قازاقستان رەسپۋبليكاسىنىڭ پايداسىنا 22 ميلليارد 600 ميلليون تەڭگە سوماسىندا موڭعول كومپانياسىنىڭ تالاپ ارىزىن قاناعاتتاندىرمادى. تۇركيا رەسپۋبليكاسىنىڭ جوعارى سوتى دا تۇرىك ازاماتىنىڭ 3 ميلليارد 300 ميلليون تەڭگە سوماسىنداعى اپپەلياتسيالىق شاعىمىن قاناعاتتاندىرعان جوق»، - دەپ اتاپ ءوتتى مارات بەكەتايەۆ.
سونداي- اق، مەكەمە دەرەكتەرىنە سايكەس، بيىلعى ناۋرىز ايىندا لوندون قالاسىنىڭ جوعارعى ادىلەت سوتى «رۋبي روز اگريكول» ج ش س وتىنىشىمەن 2013 -جىلدىڭ 1 - تامىزىنداعى تورەلىك شەشىمنىڭ كۇشىن جويۋعا قاتىستى سوت پروتسەسىندە قازاقستان رەسپۋبليكاسىنىڭ پايداسىنا شەشىم قابىلداندى. اتالعان اربيتراجدىق شەشىممەن 214 ميلليون ا ق ش دوللارىنان اساتىن تالاپ ارىز كەرى قايتارىلدى. 6 - ماۋسىم كۇنى اعىلشىن سوتى ەلىمىزدىڭ پايداسىنا 500 ميلليون دوللاردان اساتىن سوماعا شەشىم شىعاردى. سوت ق ر ادىلەت مينيسترلىگىنىڭ قازاقستانعا قارسى اربيتراجدىق ىستە الاياقتىق فاكتىسى بولۋى مۇمكىن دەگەن دالەلدەرىمەن كەلىسكەن.
«بۇل باعىتتاعى جۇمىستاردىڭ باستى اسپەكتىسى بولاشاقتا ورىن الۋى مۇمكىن داۋلاردىڭ الدىن الۋ. ءبىزدىڭ قىزمەتكەرلەر جەر قويناۋىن پايدالانۋدىڭ، ءتۇرلى الەۋمەتتىك ماڭىزى بار سالالاردا ينۆەستيتسيالىق كەلىسىمدەر مەن شارتتاردى تالقىلاۋ بويىنشا كەلىسسوزدەرگە بەلسەنە قاتىسادى»، - دەپ تۇيىندەدى مارات بەكەتايەۆ.
اربيتراج داۋدى شەشۋدىڭ ەرەكشە فورماسى. تاراپتار داۋدى شەشۋ تۋرالى مامىلەگە كەلەدى نەمەسە تاۋەلسىز سوتقا جۇگىنە الادى. تاۋەلسىز تريبۋنال ادەتتەگىدەي، حالىقارالىق قۇقىق تۋرالى تەرەڭ ءبىلىمى بار جانە اربيتراجدى پروتسەستە تاجىريبەسى مول 3 اربيتردەن تۇرادى. قازاقستان تاۋەلسىزدىكتىڭ العاشقى جىلدارى اربيتراج داۋ- دامايدى شەشۋدىڭ مىندەتتى ءتاسىلى رەتىندە قاراستىرىلعان ينۆەستيتسيالاردى قورعاۋ تۋرالى كەلىسىمگە قول قويعان.
اۆتور: ايجان سەرىكجان قىزى
