قازاق قىزى جۇرەگىنىڭ وڭ جاقتا ورنالاسقانىن 17 جاسىندا ءبىر-اق بىلگەن
بۇل تۋرالى «زامانا» گازەتى حابارلايدى.
«مەن 1995- جىلدىڭ جەلتوقسان ايىندا دۇنيەگە كەلگەنمىن، - دەيدى گۇلسەزىم.
- وتباسىمىزدا مەنەن بولەك ءۇش قىز، ەكى ۇل بار. ۇيدە مەنىڭ عانا جۇرەگىم وڭ جاقتا ورنالاسقان. ونى مەن 17 جاسقا تولعانشا بىلمەي كەلدىم. مەكتەپتى ءبىتىرىپ، وقۋعا قۇجاتتار تاپسىراتىن كەزدە ماعان مەديتسينالىق انىقتاما كەرەك بولدى. شىمكەنتتەگى قالالىق ەمحاناعا بارىپ رەنتگەنگە تۇسكەنىمدە دارىگەر تاڭقالا: «سەنىڭ جۇرەگىڭ وڭ جاعىڭدا ەكەن عوي. ونى ءوزىڭ بىلەتىن بە ەدىڭ؟»، - دەپ سۇرادى.
مۇنى ەستىگەندە مەن قاتتى تاڭقالدىم ءارى قورقىپ كەتتىم. كوڭىلىمدى بىردەن ۋايىم باستى. وسىنى بايقاعان دارىگەرلەر مەنى تىنىشتاندىرۋعا تىرىستى. بۇل جاعداي تەك مىڭنان بىرەۋدە بولاتىن قۇبىلىس، ەشقانداي زيانى جوق دەپ ءتۇسىندىردى. سوندا ۋايىمىم باسىلىپ، كەرىسىنشە، ءوزىمدى ءبىر ەرەكشە ادام رەتىندە سەزىنىپ قالعانىم بار.
جۇرەگىمنىڭ وڭ جاقتا ەكەنىن كىشكەنتاي كەزىمدە جەرگىلىكتى دارىگەرلەر دە اڭعارماعان سياقتى. ويتكەنى بىردە كەۋدەمنىڭ سول جاق تۇسى شانشىپ اۋىرعان سوڭ ەمحاناعا بارعانبىز. ولار جۇرەگىنىڭ سوعۋى ءالسىز، ەستىلمەيدى دەپ اۋداندىق اۋرۋحاناعا جولداما جازىپ بەرگەن بولاتىن. سول كەزدەرى كەۋدەمنىڭ شانشىپ اۋىرعانى باسىلدى دا، ەمحاناعا سول كۇيى بارماعان ەدىك» .
گۇلسەزىم جۇرەگىنىڭ وڭ جاقتا ەكەنىن بىلگەندە بىردەن اناسىنا حابارلاعان ەكەن، اناسى: «ونداي جاعدايلار بولاتىنىن ەستىگەنبىز، سەن قايتا ەرەكشە ادامسىڭ»، - دەپتى. ال تۋىستارى بولسا، مۇنى قىزىق كورىپ، كورگەن جەردە سۇراي بەرەدى ەكەن. اسىرەسە بۇل گۇلسەزىمنىڭ قۇربىلارى ءۇشىن ءتىپتى دە قىزىق كورىنگەن.
«ءبىر كۇنى جاقىن دوس قۇربىما جۇرەگىمنىڭ وڭ جاقتا ەكەنىن ايتقانىمدا ول: «وندا سەن ءانۇران شىرقالىپ جاتقاندا قولىڭدى وڭ جاق تۇسىڭا قويۋىڭ كەرەك. نەگە سول جاعىڭا ۇستاپ تۇراسىڭ؟ ول جاقتا ەمەس قوي جۇرەگىڭ»، - دەپ ازىلدەگەنى بار. شىنىمدى ايتسام، ونداي سوزدەردى كوڭىلىمە الىپ قالامىن. كوپ دوستارىم، تۋىستارىم دا تاڭقالىپ، قالاي سوعادى ەكەن دەپ جۇرەگىمنىڭ سوعىسىن تىڭداپ كورىپ جاتادى»، - دەيدى ول.
جالپى، گۇلسەزىم ءوزىن جايسىز سەزىنبەيدى ەكەن. تەك كەۋدەسىنىڭ سول جاق تۇسى اندا-ساندا شانشىپ تۇراتىن كورىنەدى. ەڭ سوڭعى رەت تەكسەرىلگەنىندە ماماندار وڭ جاقتا ورنالاسقانى بولماسا، ءبارى دۇرىس، جۇرەگىڭدە اقاۋ جوق دەپ ايتىپتى.
ال مەديتسينادا بۇل قۇبىلىستى «دەكستروكارديا» دەپ اتايدى ەكەن. لاتىن تىلىنەن اۋدارعاندا «دەكستر» - «وڭ»، «كاردي» - «جۇرەك» دەگەندى بىلدىرەدى. بۇدان دەنساۋلىققا تونەتىن قاۋىپ جوق. ونداي ەرەكشەلىگى بار ادامداردى ماماندار نەگىزىنەن ەلەكتروكارديوگرامماعا تۇسكەنىندە، ۋلترادىبىستىق تەكسەرۋ كەزىندە انىقتاپ جاتاتىن كورىنەدى.
...وسىنداي ەرەكشە قىز گۇلسەزىم بۇگىندە تۇركىستانداعى حالىقارالىق قازاق-تۇرىك ۋنيۆەرسيتەتىنىڭ فيلولوگيا فاكۋلتەتىندە وقىپ ءجۇر. ول قولى بوساي قالسا، قولىنا قالام الىپ، ولەڭ شىعارۋعا اۋەس. بالا كەزدەن بەرگى ارمانى جۋرناليست بولۋ ەكەن. ءبىز گۇلسەزىمنىڭ العا قويعان ارمان-ماقساتتارىنا جەتە بەرۋىنە تىلەكتەستىگىمىزدى بىلدىرەمىز.
