ەلىمىزدە تۇڭعىش رەت 17 جاستاعى جىگىتكە جۇرەك اۋىستىرۋ وتاسى جاسالدى
بۇعان دەيىن دارىگەرلەر، ناۋقاسقا جاساندى قارىنشا ورناتىپ، دونور تابىلعانشا كۇتۋ كەرەكتىگىن ايتقان بولاتىن. كوپ كۇتتىرمەستەن دونور دا تابىلىپ، اسحات جەدەل تۇردە ورالدان استاناعا جەتكىزىلدى.
اسحات قالەكەشەۆ:
- سول كۇنى دارىگەرلەر حابارلاسىپ، ماعان سايكەس دونوردىڭ تابىلعانىن ايتتى. اكەم ەكەۋىمىز تەزدەتىپ كەلگەنىمىز سول ەدى، 20 - اقپاندا جۇرەگىمدى الماستىرۋ وپەراتسياسى جاسالدى. قازىر ءوزىمدى جاقسى سەزىنەمىن.
تىلەك قالەكەشەۆ، اسحاتتىڭ اكەسى:
- ءبىزدى كۇتىپ الىپ، بالاما دونورلىق جۇرەك سالدى. قازىر بالامنىڭ جاعدايى جاقسى. تۋعان كۇنىنە سىيلىق جاسالعانداي بولدى.
اسحاتتىڭ جۇرەگىنە وسىدان ءبىر جىل بۇرىن ورناتىلعان جاساندى جۇرەك قارىنشاسى ونىڭ وپەراتسياعا دايىن بولۋىنا سەپتىگىن تيگىزگەن.
«تاراتەكس» دەپ اتالاتىن يمپلانتانت بۇل ورتالىققا جىل سايىن امەريكادان ارنايى تاپسىرىسپەن الدىرىلادى. تەك 2011 - جىلدان باستاپ 120 دان استام ادامعا وسىنداي جاساندى جۇرەك سالىنعان.
ماحاببات بەكبوسىنوۆا، «ۇلتتىق عىلىمي كارديوحيرۋرگيا ورتالىعى» ا ق باسقارما ءتوراعاسىنىڭ ءبىرىنشى ورىنباسارى:
- جالپى الەمدە 70 جىلدان استام ۋاقىت بويى جۇرەككە ترانسپلانتاتسيا جاسالىپ كەلەدى. ال ءبىزدىڭ ەلدە 2012 - جىلدان باستاپ جۇرەك الماستىرىلۋدا. وسىعان دەيىن 13 وسىنداي وپەراتسيا جاسالسا، ونىڭ ۇشەۋى وتكەن اپتادا ءساتتى اياقتالدى. ونىڭ ىشىندە 17 جاستاعى بالاعا العاش رەت جۇرەك الماستىرىلىپ وتىر. قازىردە 100 دەن استام ادام كەزەكتە تۇر.
شەتەلدىك مامانداردى دا قىزىقتىرىپ وتىرعان - جاساندى جۇرەك قارىنشاسىن ورناتۋ ءادىسى. ءتىپتى كارديوحيرۋرگيا سالاسىندا الدىڭعى قاتاردى بەرمەيتىن گەرمانيادا مۇنداي ءتاسىل ءالى قولدانىسقا ەنگىزىلمەپتى. الىس-جاقىن ەلدەردەن كەلگەن كارديولوگتار ءبىر اپتا بويى وتاندىق مامانداردان ساباق الىپ، شەبەرلىكتەرىن ارتتىرۋدا.
كريستيان چەلەنساك، كارديوحيرۋرگ:
- مەن ءۇشىن جاساندى جۇرەك قارىنشاسىن ورناتۋ تىڭ جاڭالىق. سەبەبى مەن ءوز كلينيكامدا بۇل ءتاسىلدى ءالى قولدانباپپىن. سوندىقتان بۇگىن قازاقستاندىق مامانداردىڭ شەبەرلىك ساباقتارىنىڭ كومەگىمەن بۇل وپەراتسيانىڭ قالاي جاسالاتىنىن كوردىم. بۇل يمپلانتانت ناۋقاستىڭ ءومىرىن ۇزارتادى.
مامانداردىڭ ايتۋىنشا، كارديولوگيا سالاسى جىل ساناپ دامىپ كەلەدى. 2004 - جىلى ەلىمىز بويىنشا، تەك ەكى كارديولوگيالىق بولىمشە بولسا، قازىر استانا، قاراعاندى، پاۆلودار جانە اقتوبە قالالارىندا جۇرەك اۋرۋلارىن ەمدەيتىن زاماناۋي ورتالىقتار اشىلعان.
www.24.kz
