جامبىلدىڭ 175 جىلدىعىنىڭ تاۋەلسىزدىك مەرەيتويىمەن تۇسپا-تۇس كەلۋىنىڭ سيمۆولدىق ءمانى زور - داۋرەن ابايەۆ
بۇل تۋرالى جامبىل جابايەۆتىڭ 175 جىلدىعىنا ارنالعان «ۇلى دالا اقىنى» اتتى حالىقارالىق كونفەرەنسيادا ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ ايتتى، دەپ حابارلايدى قازاقپارات ءتىلشىسى.
«بۇگىن تاريحىمىزدىڭ التىن بەسىگى سانالاتىن كونە تاراز قالاسىندا باس قوسۋىمىزدىڭ تەرەڭ ءمانى بار. بۇل ولكە - مىڭجىلدىقتاردىڭ قۇرداسى، قازاق حاندىعى قۇرىلۋىنىڭ كۋاسى. اۋليەاتا ءوڭىرى - كوپتەگەن عۇلاما عالىمدار مەن قاھارمان باتىرلاردىڭ، اتاقتى اقىن- جىراۋلار مەن قارىمدى قالامگەرلەردىڭ قۇت مەكەنى. سولاردىڭ ءبىرى، ەڭ تانىمالى - جامبىل تاۋىنىڭ ەتەگىندەگى مويىنقۇمدا دۇنيەگە كەلگەن ۇلى جامبىل جابايەۆ. بۇگىندە ەلىمىزدە ونىڭ 175 جىلدىق مەرەيتويى مەملەكەتتىك دەڭگەيدە اتالىپ ءوتىپ جاتىر»، - دەدى داۋرەن ابايەۆ.
وسى رەتتە ول مەملەكەت باسشىسى قاسىم-جومارت توقايەۆتىڭ جارلىعىمەن ۇلى اقىننىڭ مەرەيتويىن ۇيىمداستىرۋ ءۇشىن ارناۋلى مەملەكەتتىك كوميسسيا قۇرىلعانىن ەسكە سالىپ ءوتتى.
«بۇل ايتۋلى داتانىڭ بىلتىرعى اباي جىلىمەن ساباقتاسىپ، بيىلعى تاۋەلسىزدىك مەرەيتويىمەن تۇسپا- تۇس كەلۋىنىڭ سيمۆولدىق ءمانى زور. سەبەبى قازاقتىڭ قوس ۇلى اقىنىنىڭ دا اسقاق ارمانى - جۇرتىنىڭ دەربەستىگى مەن ءوسىپ- وركەندەۋى ەدى. ولار وسى ىزگى تىلەكتى ولەڭىنە وزەك، شىعارماشىلىعىنا ارقاۋ ەتتى. ءبىز بۇگىن ابىزدارىمىزعا ارمان بولعان ازاتتىقتىڭ ايشىقتى بەلەسىنە شىعىپ، بابالار ميراسىن دارىپتەپ وتىرمىز. بايىپتاپ قاراعانعا بۇل - تاريحي ءسات. سوندىقتان دا وسىناۋ ماڭىزدى ءىس- شارانىڭ ۇلىاقىننىڭ اتىمەن اتالاتىنوبلىستا وتكىزىلۋى زاڭدىلىق دەپ سانايمىن»، - دەدى ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى.
