ابايدىڭ 175 جىلدىعى قالاي اتاپ وتىلەدى
2020 -جىلى قازاق حالقىنىڭ ۇلى اقىنىنىڭ مەرەيتويىن جوعارى ۇيىمداستىرۋشىلىق جانە مازمۇندىق دەڭگەيدە مەرەكەلەۋدى قامتاماسىز ەتۋ ماقساتىندا اباي مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا قۇرىلدى.
ابايدىڭ 175جىلدىق مەرەيتويىن مەرەكەلەۋ جونىندەگى جوسپار 80 تارماقتان تۇرادى. ولاردىڭ قاتارىندا ءىرى حالىقارالىق جانە رەسپۋبليكالىق قوعامدىق ماڭىزدى، مادەني- اعارتۋشىلىق شارالار مەن مەديا جوبالار بار.
پرەزيدەنت جارلىعىنا سايكەس، ابايدىڭ «جيدەباي- ءبورىلى» مەملەكەتتىك تاريحي- مادەني جانە ادەبي- مەموريالدىق قورىق- مۋزەيىن كەشەندى جاڭعىرتۋ جونىندە قاجەتتى شارالار قابىلدانىپ، 2020 -جىلى نۇر- سۇلتان قالاسىندا ابايدىڭ 175 جىلدىق مەرەيتويىنا ارنالعان حالىقارالىق عىلىمي- پراكتيكالىق كونفەرەنسيا وتكىزۋ قاراستىرىلادى. بۇدان بولەك، اباي ەڭبەكتەرىن كەڭ تارالعان نەگىزگى شەت تىلدەرىنە ساپالى اۋدارۋدى جۇزەگە اسىرۋ، باسىپ شىعارۋ جانە حالىقارالىق ىلگەرىلەتۋ جونىندە قاجەتتى شارالار قابىلدانىپ، اباي مەرەيتويىن بىرىككەن ۇلتتاردىڭ ءبىلىم، عىلىم جانە مادەنيەت ماسەلەلەرى جونىندەگى ۇيىمى (يۋنەسكو) مەن حالىقارالىق تۇركى مادەنيەتى ۇيىمى (تۇركسوي) اياسىندا مەرەكەلەۋدى ۇيىمداستىرۋ جونىندەگى ماسەلە پىسىقتالادى.
اباي (يبراھيم) (1845-1904) — اقىن، اعارتۋشى، قازاق جازبا ادەبيەتىنىڭ، قازاق ادەبي ءتىلىنىڭ نەگىزىن قالاۋشى، فيلوسوف، كومپوزيتور، اۋدارماشى، ساياسي قايراتكەر، ليبەرالدى ءبىلىمدى يسلامعا تايانا وتىرىپ، ورىس جانە ەۋروپا مادەنيەتىمەن جاقىنداسۋ ارقىلى قازاق مادەنيەتىن جاڭارتۋدى كوزدەگەن رەفورماتور. ابايدىڭ ادەبي- ەستەتيكالىق مۇراسى - قازاق حالقىنىڭ ۇلتتىق ماقتانىشى. اباي سالعان ءداستۇرى قازاق اقىندارى مەن پروزا جازۋشىلارىنىڭ جاڭا بۋىندارىنىڭ شىعارمالارىندا جالعاسىن تابۋدا. قازاق ادەبيەتتانۋىندا اباي تانۋ سالاسى دامىپ كەلەدى. ابايدىڭ ءومىرى مەن شىعارماشىلىعى مۇحتار اۋەزوۆتى «اباي» جانە «اباي جولى» اتتى ەكى كىتاپتان تۇراتىن رومان- ەپوپەيا جازۋعا شابىتتاندىردى. كورنەكتى اقىن- اعارتۋشىنىڭ شىعارمالارى الەم حالىقتارىنىڭ كوپتەگەن تىلدەرىنە اۋدارىلعان.
