ابايدىڭ 175 جىلدىق مەرەيتويى ەلوردادا باستالادى
بۇل تۋرالى ق ر مەملەكەتتىك حاتشىسى قىرىمبەك كوشەربايەۆ ايتتى، دەپ حابارلايدى قازاقپارات ءتىلشىسى.
«الدىمىزدا كەلە جاتقان 2020-جىل ەلىمىز ءۇشىن ەرەكشە رۋحاني وقيعالار كەزەڭىنە اينالعالى وتىر. حالقىمىزدىڭ ۇلى ويشىلى، اقىن اباي قۇنانباي ۇلىنىڭ 175 جىلدىعى مەن دالا دانىشپانى، ادامزاتتىڭ ەكىنشى ۇستازى ءال-ءفارابيدىڭ 1150 جىلدىق مەرەيتويلارىن جوعارى دەڭگەيدە اتاپ ءوتۋ ءبىزدىڭ ەلدىگىمىزدى، ەگەمەندىگىمىزدى، ەڭسەلى مەملەكەتتىگىمىزدى ايشىقتايتىن بولادى. ۇلىلارىمىزدى ۇلىقتاپ، دانالارىمىزدى تورگە وزدىرۋ - حالقىمىزدىڭ مەرەيىن ۇستەم ەتەتىن يگىلىكتى سالت-ءداستۇر. ءبىز وسى ۇلى تۇلعالار ارقىلى قازاق دالاسىندا ەجەلدەن وركەنيەتتىڭ، ءبىلىم مەن عىلىمنىڭ، ادەبيەتتىڭ وركەن جايعانىن بۇكىل الەمگە جان-جاقتى پاش ەتەتىن بولامىز. سوندىقتان بۇل مەرەيتويلار ءبارىمىز ءۇشىن ارينە ۇلكەن سىن، تاريحي جاۋاپكەرشىلىك»، - دەدى مەملەكەتتىك حاتشى اباي قۇنانباي ۇلىنىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا وتىرىسىندا.
وسى ورايدا، ول مەرەيتويلاردى دايىنداۋ جانە وتكىزۋ جونىندەگى ەكى كوميسسيانىڭ جۇمىسى مازمۇندىق جاعىنان سايكەس كەلگەندىكتەن جانە ۋاقىتتى ءتيىمدى پايدالانۋ ماقساتىندا بىرگە وتكىزىلىپ وتىرعاندىعىن ەسكەرتتى.
«مەملەكەت باسشىسىنىڭ تاپسىرماسىنا سايكەس، ءبىز بۇگىنگى باس قوسۋىمىزدا 2020-جىلى وسى ەكى مەرەيتويدى وتكىزۋدىڭ جالپى رەسپۋبليكالىق جوسپارلارىن بەكىتىۋىمىز كەرەك. جوسپارلاردىڭ جوباسى جەرگىلىكتى جانە ورتالىق اتقارۋشى ورگاندارىندا، ۇكىمەتتە جانە پرەزيدەنت اكىمشىلىگىندە الدىن الا تالقىلاندى»، - دەدى ول.
وتىرىستىڭ ءبىرىنشى بولىگىندە ابايدىڭ 175 جىلدىق مەرەيتويىن وتكىزۋ جانە دايىنداۋ ماسەلەلەرى تالقىلاندى.
«حاكىم ابايدى ۇلىقتاۋعا باعىتتالعان ءىس-شارالاردىڭ باستاۋى الداعى جىلدىڭ 8- قاڭتارىندا نۇر-سۇلتان قالاسىندا «قازاقستان» ورتالىق كونسەرت زالىندا سالتاناتتى شارامەن اشۋ ۇسىنىلىپ وتىر. سونداي-اق، نەگىزگى مەرەيتويلىق شارالار ۇلى ابايدىڭ كىندىك قانى تامعان قاسيەتتى سەمەي وڭىرىندە اتالىپ وتىلمەك. وسى جانە وزگە دە ىرگەلى ءىس-شارالار جالپى رەسپۋبليكالىق جوسپارىنىڭ جوباسىندا قاراستىرىلعان»، - دەدى قىرىمبەك كوشەربايەۆ.
