كورەيالىقتار قازالىدا 1757 ءتۇپ الما اعاشىن وتىرعىزدى

قىزىلوردا وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى، كورەي ەلى وكىلدەرىنىڭ باستاماسىمەن قازالى قالاسىنىڭ تۇرعىندارىنا 1757 ءتۇپ الما اعاشى كوشەتى تابىستالدى. كورەيالىق ازاماتتار قالاداعى وياز باعىنا بارىپ، ەلمەن بىرگە كوشەتتەردى وتىرعىزدى.

وياز باعىنداعى شاراعا قازالى قالاسى اكىمىنىڭ ورىنباسارى المات ءابىلحان، قىزىلوردا وبلىستىق ورمان شارۋاشىلىعى جانە جانۋارلار دۇنيەسى كوميتەتى، ورمان جانە ەرەكشە قورعالاتىن تابيعي اۋماقتار باسقارماسىنىڭ باسشىسى ماقسات ەلەمەسوۆ قاتىستى. ولار تۇرعىنداردى قالانى كوركەيتىپ، كوگالداندىرۋعا شاقىردى.

«ءبىز سىر ءوڭىرىنىڭ جاسىل جەلەككە اينالۋىنا تىلەكتەسپىز. ويتكەنى، وسى ايماققا، سونىڭ ىشىندە قازالى جەرىنە زامانىندا كارىس ۇلتىنىڭ وكىلدەرى جەر اۋدارىلعان بولاتىن. ولارعا جەرگىلىكتى حالىق قامقورلىق كورسەتتى. سوندىقتان، بۇگىنگى شارا قازاق حالقىنىڭ قامقورلىعىنا ايتقان العىسىمىز. يگى نيەتپەن اكەلگەن جەمىس اعاشتارى كوكتەپ، ول وسى ەلگە سايا بولسا دەيمىز»، - دەيدى كورەي ەلىنىڭ وكىلى كيم گي حەن.

ايتا كەتەيىك، ەكىنشى دۇنيەجۇزىلىك سوعىس جىلدارىندا قازالى وڭىرىنە كارىستەر قيىر شىعىستان جەر اۋدارىلعان بولاتىن. قازىرگى كۇنى دە اۋداندا 60-تان استام كارىس ۇلتىنىڭ وكىلى ءومىر سۇرۋدە.

سارسەنقۇل نازار

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى