كابۋل اۋەجايىندا بولعان جارىلىستا 170 ادام كوز جۇمعان
ەستەرىڭىزدە بولسا، كەشە اۋە ايلاعىنىڭ ماڭىندا ەكى ءىرى جارىلىس بولعان ەدى. قاندى وقيعانى «يراك پەن ليەۆانت لاڭكەستىك ۇيىمى» جاساعانىن مالىمدەدى. سوڭعى اقپارات بويىنشا، «تاليبان» قوزعالىسىنىڭ وكىلدەرى تۇركيا بيلىگىنە كابۋل حالىقارالىق اۋەجايىن باسقارۋدى ۇسىنعان. ولار رەسمي انكاراعا اۋە ايلاعىنداعى اكىمشىلىك جۇمىستاردى سەنىپ تاپسىرماق. ال قاۋىپسىزدىك ماسەلەسىن تالىپتەر ءوز موينىنا الادى. بۇل تۋرالى تۇرىك ەلىنىڭ پرەزيدەنتى رەجەپ تايىپ ەردوعان مالىمدەدى.
مەملەكەت باسشىسى بۇل ماسەلە بويىنشا ناقتى شەشىم ءالى قابىلدانباعانىن جانە سول ءۇشىن ازىرگە اۋەجايدى باسقارۋ ۇسىنىسىنا جاۋاپ بەرمەگەنىن جەتكىزدى.
رەجەپ تايىپ ەردوعان، تۇركيا پرەزيدەنتى:
- تۇركيانىڭ كابۋلداعى ەلشىلىگىندە «تاليبان» وكىلدەرىنىڭ قاتىسۋىمەن كەزدەسۋ ءوتتى. باسقوسۋ 3,5 ساعاتقا سوزىلدى. قاجەت بولسا، كەلىسسوزدەردى قايتا وتكىزۋگە بولادى. تالىپتەر بىزگە كابۋل اۋەجايىن باسقارۋدى ۇسىندى. ءبىراق ءبىز ءالى جاۋاپ بەرگەن جوقپىز. ويتكەنى اۋە ايلاعىنداعى قاۋىپسىزدىك ماسەلەسىنە الاڭداپ وتىرمىز. كەز كەلگەن ساتتە وقىس وقيعا بولىپ قالۋى مۇمكىن. ءبىز باسشىلىق ەتكەندە، كەشەگىدەي لاڭكەستىك ارەكەت قايتالانسا، مۇنى قالاي تۇسىندىرەمىز؟
