بۇگىن جىر الىبى جامبىلدىڭ تۋعانىنا 170 جىل تولدى
ول جاسىنان ولەڭ- جىرعا قانىپ وسكەن، ءوز اناسى ۇلداننىڭ اقىندىق تالانتىن بويىنا سىڭىرگەن، «مەنىڭ ءپىرىم - ءسۇيىنباي...» دەپ جامبىلدىڭ ءوزى جىرعا قوسقانداي، ءسۇيىنباي ارون ۇلى سياقتى جىر داڭعىلىنان ءتالىم- تاربيە العان.
جامبىل 1919 - جىلى جەتىسۋ حالىق اقىندارى باس قوسقان سلەتكە قاتىستى. 1934 - جىلى رەسپۋبليكالىق ونەر شەبەرلەرىنىڭ تۇڭعىش سلەتىندە جىر تولعاپ، تاعى ءبىر كوزگە ءتۇستى. «زامانا اعىمى»، «بەلسەندىلەرگە»، «قازاقستان تويىنا»، «جاستار الدىنداعى ءسوز» سياقتى ارناۋ، تولعاۋلارى وسى تۇستا جىرلاندى. ونىڭ ۇزدىك شىعارمالارى 40-تان استام شەت ەلدەر تىلدەرىنە اۋدارىلدى. ۇلى جىراۋ قازاق حالقىن، ونىڭ پوەزياسىن بۇكىل الەمگە جاريا ەتتى. 1938 - جىلى جامبىلدىڭ شىعارماشىلىق ونەرىنىڭ 75 جىلدىعىن تويلاعاندا، وعان الەمنىڭ ءار تۇكپىرىنەن قۇتتىقتاۋلار كەلدى. رومەن روللان، مارتين اندەرسەن، نەكسە، كاتارينا سۋساننا پريچارد سياقتى اتاقتى سۋرەتكەرلەر جامبىل پوەزياسىنا وتە جوعارى باعا بەردى.
جامبىل تۋرالى جۇزدەگەن ولەڭ- جىرلار جازىلدى. 20-عاسىرداعى حالىق اقىندارىنا جامبىلدىڭ اسەرى وتە زور بولدى. بۇل قاتاردا كەنەن ازىربايەۆ، ۇمبەتالى كارىبايەۆ، ءابدىعالي سارييەۆ، نارتاي بەكەجانوۆ، دوسكەي الىمبايەۆ، ءسايادىل كەرىمبەكوۆ، ورىنباي تايمانوۆ سياقتى بەلگىلى يمپروۆيزاتورلار بار. 1941 -جىلى ستاليندىك (كەيىن ك س ر و مەملەكەتتىك) سىيلىعىنىڭ لاۋرەاتى اتانعان. 1- سايلانعان قازاق ك س ر جوعارعى كەڭەسىنىڭ دەپۋتاتى، ك س ر و جانە قازاقستان جازۋشىلار وداعىنىڭ مۇشەسى بولدى. جامبىلدىڭ ەسىمى قازاقستاننىڭ ءبىر وبلىسىنا، بىرنەشە اۋداندارعا، ءبىرقاتار ەلدى مەكەندەرگە، مەكەمەلەر مەن وقۋ ورىندارىنا، ونەر وردالارىنا، مەكتەپتەرگە، كوشەلەرگە بەرىلگەن. قازاق حالقى جامبىلدىڭ 100 جىلدىق، 125 جىلدىق، 150 جىلدىق، 160 جىلدىق تويلارىن حالىقارالىق دەڭگەيدە سالتاناتتى تۇردە اتاپ ءوتتى. جالپى، اقىننىڭ شىعارمالارى دۇنيە جۇزىندە قىرىقتان استام تىلگە اۋدارىلعان.
ەلىمىزدە جامبىل اقىننىڭ 170 جىلدىعىنا ارنالعان ءتۇرلى شارالار ۇيىمداستىرىلىپ جاتىر. تاۋەلسىزدىگىمىزدىڭ 25 جىلدىعىمەن تۇسپا- تۇس كەلىپ وتىرعان وسى ءدۇبىرلى مەرەكە 26 - اقپان كۇنى قازاق ۇلتتىق اگرارلىق ۋنيۆەرسيتەتىندە «جىر الىبى - جامبىل» اتتى ادەبي- سازدى رۋحاني كەشكە ۇلاستى. رۋحاني شارانىڭ باستى ماقساتى - ءسوز مايەگىن كيە تۇتقان ابىز جىراۋدىڭ شىعارماشىلىعىن، رۋحاني باي مۇراسىن ناسيحاتتاۋ.
ايتۋلى داتاعا وراي قازاق مەملەكەتتىك قىزدار پەداگوگيكالىق ۋنيۆەرسيتەتىندە الماتى قالاسىنىڭ، الماتى وبلىسىنىڭ اكىمدىكتەرىنىڭ جانە ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ۇيىمداستىرۋىمەن جىر الىبى ج. جابايەۆتىڭ قۇرمەتىنە ارنالعان «جامبىل جابايەۆ - ۇلى دالانىڭ الىپ جىرشىسى» اتتى حالىقارالىق عىلىمي- تەوريالىق كونفەرەنسيا ءوتتى.
سونداي- اق 25 - اقپان كۇنى قازاقستان رەسپۋبليكاسىنىڭ ۇلتتىق مۋزەيىندە جامبىل جابايەۆتىڭ 170 جىلدىعىنا ارنالعان «الەم اقىنى» اتتى ادەبي كەش ءوتتى.
ال جامبىل وبلىسىندا «تىڭدا، دالا، جامبىلدى!» اتتى رەسپۋبليكالىق جىرشى- تەرمەشىلەر بايقاۋى ءوتتى. ءىس- شاراعا جامبىلدىڭ ۇرپاقتارى، شوبەرەسى بەكجان ماحمەتوۆ جانە مۇراتحان جامبىلوۆ ارنايى قاتىستى.
