جامبىل وبلىسىندا ج. جابايەۆتىڭ 170 جىلدىعىنا ارنالعان رەسپۋبليكالىق جىرشى-تەرمەشىلەر بايقاۋى ءوتتى
بۇل تۋرالى اكىمدىكتىڭ باسپا ءسوز قىزمەتىنەن حابارلادى. ءىس-شارا قازاق حالقىنىڭ ۇلى پەرزەنتى - اقىن، ايتىسكەر، سازگەر، جىر الىبىنىڭ ءومىرى مەن شىعارماشىلىعىنا ارنالعان.
مۇشايراعا ەلىمىزدىڭ تۇكپىر تۇكپىرىنەن 17 جاستان جوعارى 34 جىر، تەرمە ورىنداۋشىلارى قاتىستى.
ورتالىق كونتەرتتىك زالدىڭ ساحناسىندا جەتىسۋلىق اۆتورلاردىڭ تەرمە، داستان، تولعاۋلارىنان ۇزىندىلەر شىرقالادى. ولاردىڭ اراسىندا جامبىل جابايەۆتىڭ جىرلارىنان ۇزىندىلەر، ساۋىتبەك، ءسۇيىنباي، ۇمبەتالى، كەنەن ازىربايەۆ، اياز بەتبايەۆتىڭ شىعارمالارى بار.
ءىس-شاراعا جامبىلدىڭ ۇرپاقتارى، شوبەرەسى بەكجان ماحمەتوۆ جانە مۇراتحان جامبىلوۆ ارنايى قاتىستى.
جىر الىبىنىڭ شىعارمالارىن ورىنداعان بايقاۋ قاتىسۋشىلارىنىڭ تالانتىن بەلگىلى مادەنيەت جانە ونەر قايراتكەرلەرى، ءداستۇرلى انشىلەر دۇيسەنبەك ومىراليەۆ، قاپاش قۇلىش، ءابدىمومىن جەلدىبايەۆ، اياز بەتبايەۆ، ەلىكباي يسا باعالادى.
سىنعا تۇسكەندەردىڭ ىشىنەن وق بويى وزىق شىققان الماتىلىق راحىمباي دانيار باس جۇلدەنى يەلەنسە، ءبىرىنشى ورىندى توقتاعانوۆا ماقپال مەن جامبىلدىق سۇلۋجان ابەنوۆا قانجىعاسىنا بايلادى.
ەكىنشى، ءۇشىنشى ورىنداردى استانا، الماتى، قىزىلوردا، شىعىس قازاقستان وبلىستارىنىڭ قاتىسۋشىلارى ءوزارا ءبولىستى. رەسپۋبليكالىق ونەر جارىسىنىڭ جەڭىمپازدارىنا ديپلومدار، اقشالاي جۇلدەلەر تابىستالدى.
ءىس-شارانىڭ ماقساتى - ۇلتتىق ونەرىمىزدى ساقتاپ، كەيىنگى ۇرپاققا جەتكىزۋ. ەلىمىزدەگى جىرشىلىق، تەرمەشىلىك ءداستۇردى جالعاستىرۋ، حالىق شىعارماشىلىقتى قولداۋ، ەلىن سۇيگەن اقىننىڭ شىعارماشىلىعىن وسكەلەڭ ۇرپاققا ۇلگى ەتۋ.
