قازاقستان حالقىنىڭ سانى 17 ميلليون 671 مىڭ ادامعا جەتتى
وسىلايشا، 2015 -جىلعى 1 - قاڭتارمەن سالىستىرعاندا حالىق سانى 253,6 مىڭ ادامعا نەمەسە 1,46 پايىزعا ءوستى. بۇل تۋرالى ۇلتتىق ەكونوميكا مينيسترلىگى ستاتيستيكا كوميتەتىنىڭ باسپا ءسوز قىزمەتىنەن حابارلاندى.
ازاماتتىق حال اكتىلەرى جازبالارىنداعى مالىمەتتەردى وڭدەۋ ناتيجەسىندە، 2015 - جىلدىڭ قاڭتار- جەلتوقساندا تۋىلعاندار سانى 398,6 مىڭ ادامدى قۇرادى، بۇل 2014 ج. قاڭتار- جەلتوقسانعا قاراعاندا 0,6 پايىزعا از. تۋۋدىڭ جالپى كوەففيسيەنتى 1000 ادامعا 22,72 تۋىلعانداردى قۇراعان.
قاراستىرىلىپ وتىرعان كەزەڭدە قايتىس بولعاندار سانى 131,9 مىڭ ادامدى قۇرادى، بۇل 2014 ج. قاڭتار- جەلتوقسانعا قاراعاندا % 0,2 از. ءولىم- ءجىتىمنىڭ جالپى كوەففيسيەنتى 1000 ادامعا 7,52 (7,65) قايتىس بولعانداردى قۇرادى.
جالپى بىلتىرعى جىلى رەسپۋبليكا حالقىنىڭ تابيعي ءوسىمى 2014 - جىلمەن سالىستىرعاندا 2,1 مىڭ ادامعا نەمەسە 0,8 پايىزعا ازايىپ، 266,7 مىڭ ادامدى قۇرادى. تابيعي ءوسىمنىڭ جالپى كوەففيسيەنتى 1000 ادامعا شاققاندا 15,20 ادامدى قۇرادى.
2015 - جىلعى قاڭتار- جەلتوقساندا رەسپۋبليكادا 1 جاسقا دەيىنگى 3742 نارەستە ءولىمى تىركەلدى. وسىلايشا 1 جاسقا دەيىنگى شەتىنەگەن نارەستە سانى 5,1 پايىزعا ازايدى. نارەستە ءولىم- ءجىتىمىنىڭ نەگىزگى سەبەبى - پەريناتالدىق كەزەڭدە پايدا بولاتىن جاعدايلار.
«كوشى- قون پوليتسياسى ورگاندارى ۇسىنعان مالىمەتتەرگە قاراعاندا، 2015 - جىلى ەلىمىزگە تۇرعىلىقتى تۇرۋعا كەلگەندەردىڭ تىركەلۋ سانى 2014 - جىلمەن سالىستىرعاندا 0,7 پايىزعا كەمىپ، 16670 ادامدى قۇراعان. ەلىمىزدەن كەتكەن كوشىپ- قونۋشىلاردىڭ تىركەلۋ سانى 3,9 پايىزعا كوبەيىپ، 30080 ادام بولدى. ەلىمىزدەگى نەگىزگى كوشى- قون الماسۋى ت م د مەملەكەتتەرىمەن ورىن العان. ال ءوڭىرارالىق كوشىپ- قونۋشىلاردىڭ ۇلەسىنە ەلىمىزدىڭ جالپى ىشكى كوشىپ- قونۋشىلار سانىنىڭ 42,9 پايىزى تيەسىلى. ءوڭىرارالىق كوشى- قوننىڭ وڭ ايىرىمى الماتى (41927 ادام) قالاسىندا جانە اقمولا (3633 ادام)، قوستاناي (1 075 ادام)، ماڭعىستاۋ (575 ادام)، پاۆلودار (336 ادام)، باتىس- قازاقستان (184 ادام) وبلىستارىندا قالىپتاستى»، - دەلىنگەن باسپا ءسوز بايانىندا.
