الماتىدا 16 قاباتتى ۇيدە بولعان ورتكە قاتىستى تولىق مالىمەت ۇسىنىلدى
«1-تامىزدا ساعات 17:10-دا ت ج د كۇشتەرى مەن قۇرالدارى جوعارى دارەجە بويىنشا الاتاۋ اۋدانى، اقكەنت شاعىناۋدانى، 54-مەكەنجايىنا جىبەرىلدى.
6 مينۋتتان كەيىن جەتكەن سوڭ، 1 دەن 16 شى قاباتقا دەيىن 80 شارشى مەتر اۋماقتا كابەل شاحتاسىندا ەلەكتر كابەلدەرى اشىق جالىنمەن جانىپ جاتقانى انىقتالدى.
رايمبەك داڭعىلىندا كولىك كەپتەلىسى بولعانىنا جانە ءورت ءسوندىرۋ تەحنيكاسىنىڭ كىرۋ جولدارى تۇراقتا تۇرعان كولىكتەرمەن شەكتەلگەنىنە قاراماستان، العاشقى ءورت ەسەپتەرى 6 مينۋتتا جەتتى.
جوعارى قاباتتاردا جانە ەۆاكۋاتسيا جولدارىندا قويۋ ءتۇتىن مەن جوعارى تەمپەراتۋرا قالىپتاستى. تۇرعىنداردىڭ دەنساۋلىعىنا قاۋىپ ءتوندى.
ءتۇنىننىڭ قالىڭ بولۋى ءورت ءسوندىرۋدى قيىنداتتى. گاز-تۇتىننەن قورعاۋ قىزمەتىنىڭ (گ ت ق ق) جۇمىسى ۇيىمداستىرىلدى، گ ت ق ق ماماندارى 80 ادامدى، ونىڭ ىشىندە 35 ادامدى قۇتقارۋ قالپاعىنىڭ كومەگىمەن، قالعان تۇرعىنداردى ارنايى تەحنيكانىڭ كومەگىمەن قۇتقاردى. بارلىعى 200-دەن استام ادام ەۆاكۋاتسيالاندى.
ادامداردى ەۆاكۋاتسيالاۋ جانە قۇتقارۋ ءۇشىن 3 ءورت ساتىسى، بەسىكتەرى بار 2 اۆتوكران، «ارالاس تاسىلمەن» قول ءورت ساتىسى (ءۇشساتىلى باسپالداق، شابۋىل باسپالداعى) ورنالاستىرىلدى
قابىلدانعان شارالاردىڭ ناتيجەسىندە ءورت 18.46-دا ءسوندىرىلدى.
وقيعا ورنىندا: توتەنشە جاعدايلار دەپارتامەنتىنىڭ 50 قىزمەتكەرى مەن 14 تەحنيكاسى، پوليتسيا دەپارتامەنتىنىڭ 40 قىزمەتكەرى مەن 11 تەحنيكاسى، قۇتقارۋ قىزمەتىنىڭ 12 قىزمەتكەرى مەن 6 تەحنيكاسى، جەدەل مەديتسينالىق كومەكتىڭ 69 قىزمەتكەرى مەن 23 تەحنيكاسى جۇمىلدىرىلدى»، - دەلىنگەن مينيسترلىك مالىمەتىندە.
ەسكە سالا كەتەيىك، 1-تامىز كۇنى الماتىدا 16 قاباتتى ءۇي ورتەندى. امالى قالماعان تۇرعىندار بالالارىن تەرەزەدەن لاقتىردى.
قىزىل جالىن ساعات 18:46 كەزىندە ءسوندىرىلدى.
العاشىندا 31 ادام، ونىڭ ىشىندە 16 بالا اۋرۋحاناعا جەتكىزىلگەنى حابارلانعان بولاتىن.
زارداپ شەككەندەردىڭ اراسىندا 2 جۇكتى ايەل بار.
كەيىنگى مالىمەت بويىنشا، وقيعا سالدارىنان 1 ادام مەرت بولىپ، 43 ى زارداپ شەكتى. ونىڭ ىشىندە 4 بالا رەانيماتسيا بولىمىندە جاتىر.
الاتاۋ اۋدانىنىڭ اكىمى ازامات قالدىبەكوۆتىڭ توراعالىعىمەن ءۇي الدىندا جەدەل شتاب قۇرىلدى. تۇرعىندار تاماق جانە جاتىن ورىنمەن قامتاماسىز ەتىلدى.
سونداي-اق، الماتىداعى الاپات ورتتەن كەيىن 37 ادام اۋرۋحاناعا جەتكىزىلدى، 4 بالا رەانيماتسيادا جاتىر.
اۆتور:
ميرا تولەندى قىزى
