توتەنشە جاعدايلار مينيسترلىگى 16 تىكۇشاق ساتىپ الماق

«الەمدە ورمان ءارى دالا ءورتى كوبەيگەنى بايقالىپ وتىر. قازاقستاندا ءۇش جىل بۇرىن 700 ورمان ءورتى تىركەلسە، بىلتىر 757 ءورت بولدى. قازىردىڭ وزىندە 146 ورمان ءورتى تىركەلدى. ورتكە قارسى قىزمەتتەردى قامتاماسىز ەتۋ، جابدىقتاۋ ماسەلەسىنە توقتالساق، ەلدى مەكەندەردى ورتتەن قورعاپ جاتقان 426 ءورت ءسوندىرۋ ءبولىمى ۇيىمداستىرىلعان. الايدا نورماتيۆ دەڭگەيىنە جەتۋ ءۇشىن تاعى دا 121 وسىنداي ءبولىمدى سالۋ كەرەك»، - دەدى ي. كۇلشىمبايەۆ سەناتتىڭ جالپى وتىرىسىندا.

ونىڭ ايتۋىنشا، جول كارتاسى بويىنشا ەل اۋماعىندا 21 ءورت ءسوندىرۋ بەكەتىنىڭ قۇرىلىسى ءجۇرىپ جاتىر. كەيىنگى 10 جىلدا 18 نىسان عانا سالىنعان. بىلتىردان بەرى بۇل باعىتتاعى جۇمىستار كۇشەيتىلدى.

«تەحنيكا جايىندا ايتاتىن بولساق، توتەنشە جاعدايلار مينيسترلىگىنىڭ تەحنيكامەن جابدىقتالۋى 80 پايىز دەڭگەيىندە. 3600-دەن استام تەحنيكا بولۋى كەرەك، قازىر سونىڭ 3200- ءى بىزدە بار، ياعني 430 تەحنيكا قاجەت. اتاپ ايتقاندا، 470 تەحنيكانى پايدالانۋ مەرزىمى 20 جىلدان اسىپ كەتكەن» ، - دەدى ۆيتسە- مينيستر.

ونىڭ سوزىنە قاراعاندا، بۇل ماسەلەنى شەشۋ ءۇشىن مەملەكەت باسشىسىنىڭ تاپسىرماسى اياسىندا كەشەندى جوسپار ازىرلەندى.

«ناۋرىز ايىندا رەسپۋبليكالىق بيۋدجەت كوميسسياسى وتىرىسىندا 605 ميلليارد تەڭگە ماقۇلدانىپ، سونىڭ 536 ميلليارد تەڭگەسى توتەنشە جاعدايلار مينيسترلىگىنە، 48 ميلليارد تەڭگەسى ەكولوگيا مينيسترلىگىنە، جانە 20 ميلليارد تەڭگەسى جەرگىلىكتى اتقارۋشى ورگاندارىنا قاراستىرىلعان.

سونىمەن قاتار، اۋە قۇتقارۋ جۇيەسىن دامىتۋ ءۇشىن كەيىنگى ءۇش جىلدا 11 تىكۇشاق الىندى. كەشەندى جوسپار اياسىندا 2027 -جىلعا دەيىن تاعى 16 تىكۇشاق جەتكىزىلەدى»، - دەدى يبراگيم كۇلشىمبايەۆ.

بۇدان بولەك ول باسپاناسىز جۇرگەن قىزمەتكەرلەرگە وتەماقى رەتىندە بەرىلەتىن قاراجات قاراستىرىلىپ جاتقانىن ايتتى.

ايتا كەتەيىك، توتەنشە جاعدايلار مينيسترلىگىندە جالپى 33 تىكۇشاق بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى