اتىراۋدا 16 جاسار قىزدى ىزدەستىرىپ جاتقان سۇڭگۋىرلەر جۇمىستى توقتاتۋعا ءماجبۇر بولدى

اتىراۋ وبلىستىق توتەنشە جاعدايلار دەپارتامەنتى قوعاممەن بايلانىس توبىنىڭ مالىمەتىنشە، 16 جاسار قىز 6-ساۋىردە ءىز-ءتۇزسىز جوعالىپ كەتكەن.

«جاس ءوسپىرىم قىز اتا-اناسىنا ەسكەرتپەي، ۇيىنەن شىعىپ كەتىپ، قايتا ورالماعان. دەپارتامەنتتىڭ ديسپەتچەرلىك پۋلتىنە 7 -ساۋىردە 2007 -جىلعى جاس ءوسپىرىمنىڭ جوعالعانى تۋرالى حابار ءتۇستى. سول كۇننەن بەرى جەدەل قۇتقارۋ جاساعىنىڭ قۇتقارۋشىلارى كامەلەتكە تولماعان ءجاسوسپىرىم قىزدى ىزدەستىرىپ جاتىر. ازىرگە ىزدەۋ جۇمىستارى ناتيجە بەرگەن جوق»، - دەپ حابارلادى دەپارتامەنتتىڭ قوعاممەن بايلانىس توبى.

ىزدەستىرۋ جۇمىستارىنا جەدەل- قۇتقارۋ جاساعىنىڭ كينولوگيالىق ەسەبى، 14 قۇتقارۋشى، 4 ءجۇزۋ قۇرالى تارتىلعان. سونداي-اق، جاس ءوسپىرىمنىڭ تۋىستارى، ەرىكتىلەر مەن جەرگىلىكتى تۇرعىندار جايىق وزەنىنىڭ جاعالاۋىنا بارلاۋ جۇمىستارىنا كومەكتەسكەن.

«وسى كەزگە دەيىن جەدەل-قۇتقارۋ جاساعىنىڭ سۇڭگۋىرلەرى جايىق وزەنىنىڭ 730 شارشى مەتردەن استام اۋماعىندا سۋ استىنان ىزدەۋدى جۇرگىزدى. الايدا، بۇگىن، 19-ساۋىردە جايىق وزەنىندە سۋ دەڭگەيىنىڭ كوتەرىلۋىنە، اعىستىڭ جىلدامدىعى مەن جەل ەكپىنىنىڭ كۇشەيۋىنە بايلانىستى ىزدەستىرۋ توقتاتىلدى. ويتكەنى، سۇڭگۋىرلەرگە وزەن اعىسىنىڭ جىلدامدىعى سەكۋندىنا 2 مەتر بولعاندا ىزدەستىرۋدى جۇرگىزۋگە رۇقسات ەتىلەدى. قازىر جايىق وزەنىندەگى سۋ اعىسىنىڭ جىلدامدىعى - سەكۋندىنا 3,5-4 مەتر»، - دەپ ءمالىم ەتتى قوعاممەن بايلانىس توبىنان.

سونداي-اق، وزەندەگى كەرى اعىس پەن سۋ استىندا بوگدە زاتتاردىڭ كوپ كەزدەسۋى، كورىنۋ دەڭگەيىنىڭ تومەندىگى قيىندىق تۋدىرعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى