الماتىدا وتىرعىزىلعان تالداردىڭ 16 پايىزى قۋراپ كەتتى
بۇل تۋرالى قالالىق جاسىل ەكونوميكا باسقارماسىنىڭ باستىعى ناتاليا ليۆينسكايا ونلاين بريفينگ بارىسندا ايتتى، دەپ حابارلايدى قازاقپارات ءتىلشىسى.
سپيكەردىڭ سوزىنشە، كوكتەمدە 64 مىڭ كوشەت وتىرعىزىلدى، كۇزدە تاعى 300 مىڭ ءتۇپ وتىرعىزۋ جوسپاردا. بىلتىر وتىرعىزىلعان 282 مىڭ كوشەتتىڭ 16 پايىزى جەرسىنبەدى.
«راس 44 مىڭ اعاش تامىر جايعان جوق. قۋراپ كەتتى. ستاندارتتار بويىنشا اعاشتاردى جاپپاي وتىرعىزۋ كەزىندە 15 پايىزى جەرسىنبەيدى. سوندىقتان بىزدە تەك ءبىر پايىز عانا ارتىق. ءبىز 2019 -جىلدان بەرى وتىرعىزعان بارلىق كوشەتتەردى جۇيەلى تۇردە باقىلاپ وتىرامىز. كەيبىر تۇرلەرى بويىنشا قيىندىقتار بار. مىسالى، الاتاۋ اۋدانىنداعى قاراعاي توعايى. قاراعاي مەن شىرشالاردىڭ اشىق كۇن استىندا تامىر جايىپ كەتۋى وتە قيىن. نەگىزى، ولار تاۋ بوكتەرىندە وسەتىن اعاشتار. قازىر ءبىز ولاردى ەمدەپ جاتىرمىز»، - دەدى ناتاليا ليۆينسكايا.
سونىمەن قاتار، ول بيىل تامىر جايۋى تومەن ءارى اۋرۋعا بەيىم اعاشتار وتىرعىزىلمايتىنىن جەتكىزدى. «ءبىز اعاش كۇتىمىنە، جاسىل قوردى ساۋىقتىرۋعا جانە بيوارتۇرلىلىكتى ساقتاۋعا كوشتىك. الماتىنىڭ جاسىل جەلەكتەرىن سۋلاندىرۋ ءۇشىن جاڭا سكۆاجينالار سالىندى، سۋارمالى ارىق تورابىنا ينۆەنتاريزاتسيا جۇرگىزىلدى، سۋارۋ جۇمىستارى كۇشەيتىلدى»، - دەدى جاسىل ەكونوميكا باسقارماسىنىڭ باسشىسى.
ناتاليا ليۆينسكايا قالادا وتىرعىزىلعان وسىمدىكتەردىڭ اۋقىمى كليمات پەن توپىراق قۇرامىنا بايلانىستى عىلىمي قاۋىمداستىقپەن، لاندشافت ماماندارىمەن بىرگە ىرىكتەلەتىنىن باسا ايتتى.
«بۇل رەتتە جاسىل جەلەكتەردىڭ ءتىزىلىمى قالىپتاستى، وندا ءار تالدىڭ ەلەكتروندى پاسپورتى بار. رەەستر جاسىل قوردىڭ ساپالىق جانە ساندىق جاعدايىنىڭ ەسەبىن جۇرگىزۋگە مۇمكىندىك بەرەدى. جۇيە سونىمەن قاتار وتىرعىزۋ الاڭدارىن، ونىڭ ىشىندە وتەماقىنى باقىلاۋعا مۇمكىندىك بەرەدى. جۇيە بارلىعىنا 2021 -جىلدىڭ قىركۇيەگىنەن باستاپ باسشىلىقتىڭ رەسمي سايتىندا قولجەتىمدى بولادى»، - دەدى باسقارما باسشىسى.
سونىمەن قاتار، اعاشتاردى ساۋىقتاندىرۋ مەن ەمدەۋ جۇمىستارى، زيانكەستەر مەن زەڭگە قارسى ءتورت رەت بيولوگيالىق وڭدەۋ قاتار جۇرگىزىلۋدە.
