قازاقستاننىڭ «جاسىل كوپىر» باعدارلاماسىن 16 مەملەكەت قولدادى
بۇل تۋرالى حالىقارالىق جاسىل تەحنولوگيالار جانە ينۆەستيتسيالار ورتالىعىنىڭ باسشىسى ءراپىل جوشىبايەۆ مالىمدەدى.
«ءبىزدىڭ ورتالىق قىزمەتى «جاسىل كوپىر» سەرىكتەستىك باعدارلاماسىن قايتا جانداندىرادى. قازاقستاننىڭ بۇل ءىرى باستاماسىنا الەمنىڭ 16 مەملەكەتى مەن 16 ۇيىمى قولداۋ ءبىلدىردى»، - دەدى ءراپىل جوشىبايەۆ «قازاقستانداعى تۇراقتى قالالىق ينفراقۇرىلىم: استاناداعى جاسىل قۇرىلىس كورسەتكىشتەرى» دوڭگەلەك ۇستەلىندە.
سونىمەن بىرگە، باعدارلاماعا جاڭا ءىرى مەملەكەتتەر قوسىلۋى مۇمكىن.
«بيىل «جاسىل كوپىر» باعدارلاماسىنا كورشىلەس قىتاي مەن وڭتۇستىك كورەيا ەلدەرى قوسىلادى. قازاقستانداعى عيماراتتاردىڭ ەنەرگيا-سۋ تيمىدىلىگىن ارتتىرۋ اۋا ساپاسىن جاقسارتىپ، سۋ رەسۋرستارىن ساقتاۋمەن قاتار، قۇرىلىس سالاسىندا جاڭا تەحنولوگيالاردى قولدانۋعا ىقپال ەتەدى. قازىر دە ءبىز كەلىسىم بەكىتكەن ءاربىر قالامەن جاسىل تەحنولوگيالاردى دامىتۋدىڭ، قالالىق ينفراقۇرىلىمعا ينۆەستيتسيا تارتۋدىڭ جول كارتاسىن ازىرلەپ، حالىقارالىق تاجىريبەلەردى زەرتتەپ جاتىرمىز»، - دەدى ءراپىل جوشىبايەۆ.
ايتا كەتەيىك، بيىل قازاقستان نيۋ-يوركتە وتەتىن ب ۇ ۇ ساياسي فورۋمىندا تۇراقتى دامۋ ماقساتتارىن جۇزەگە اسىرۋ بويىنشا ەرىكتى ۇلتتىق شولۋىن ۇسىنادى.
