قاراعاندى وبلىسىنىڭ اكىمى ەكى كۇندە ماسەلەمەن كەلگەن 16 تۇرعىندى قابىلدادى
«وتىنىشتەردىڭ ءبىر بولىگى جۇمىسقا ورنالاستىرۋ، باسپانا بەرۋ ماسەلەلەرىنە بايلانىستى بولدى. كاسىپكەرلەر وبلىس اكىمىنە شاعىن جانە ورتا بيزنەستى دامىتۋعا، اگروونەركاسىپتىك كەشەندى دامىتۋ بويىنشا سۇراقتار قويدى»، - دەلىنگەن حابارلامادا.
بۇقار جىراۋ اۋدانى تۇزدى اۋىلىنىڭ فەرمەرى راحات مۇحامەدياروۆ جايىلىم جەر ءبولۋدى سۇرادى. بۇدان باسقا، داۋلى جەرلەرگە، مال ءوسىرۋ بويىنشا ينۆەستيسيالارعا قاتىستى ساۋالدار قويىلدى. تەمىرتاۋلىق كاسىپكەر ناتاليا لۋگينا جاڭا تەحنولوگيا بويىنشا وندىرىستە قيىندىقتار تۋىنداعان سوڭ وبلىس اكىمىنەن كومەك سۇراي كەلگەن.
«كۇيەۋىم ەكەۋىمىز كەدەي كەن ورىندارىن قۇرعاق جولمەن بايىتۋ تەحنولوگياسىن ازىرلەدىك. پاتەنت الدىق. مارگانەتس كەنىنەن باستادىق، بۇگىندە كەز كەلگەن مەتال كەنىن، قالدىقتاردى بايىتۋعا قابىلەتىمىز بار. قاراجالدا ءوندىرىستى ىسكە قوستىق. شىعارىلعان ونىمگە قاتىستى تۇتىنۋشىلارىمىز جاقسى پىكىرلەرىن ءبىلدىرىپ جاتىر. بىلتىر ءوندىرىستى كەڭەيتۋگە گرانتقا يە بولدىق. جابدىقتار ساتىپ الىپ، ونى تەمىرتاۋدا ورناتتىق. ءبىراق شيكىزات بازاسىمەن قيىندىقتار تۋىنداپ وتىر. كەن الىپ تۇرعان ءۇيىندىنى بايىتۋمەن اينالىسپايتىن فيرماعا بەرىپ قويدى»، - دەيدى ناتاليا لۋگينا.
وندىرىسكە بوس ءۇيىندى كەرەك. ەرلان قوشانوۆ قاراماعىنداعىلارعا زاڭ اياسىندا بۇل جاعدايدىڭ شەشىمىن تابۋدى تاپسىردى. قابىلداۋ بارىسىندا الەۋمەتتىك ماسەلەلەر دە كوتەرىلدى. «وتان قورعاۋشىلار» قوعامدىق بىرلەستىگىنىڭ باسشىسى ءابىلدا ابدىكارىموۆ وبلىس اكىمىمەن چەرنوبىل ا ە س- ىندەگى اپاتتى جويۋشىلاردى قولداۋ ماسەلەسىن تالقىلادى.
«ارداگەر-2012» ق ب باسشىسى باقتىباي ەسەنداۋلەتوۆ ارداگەرلەر ۇيىمدارىنىڭ جۇمىسى تۋرالى باياندادى. بالقاش تۇرعىنى ماحمۇت جارىلعاپ وبلىس اكىمىنە № 15-ليسەيگە ءاليحان بوكەيحاننىڭ ەسىمىن بەرۋدى ۇسىندى. ءاربىر جاعداي ەگجەي-تەگجەيلى تالقىلاندى. پروبلەمالىق ماسەلەلەر بويىنشا شەشىم قابىلداۋ ءۇشىن جۇمىستار جۇرگىزىلەدى.
