تاۋەلسىزدىك كۇنى - 16 - جەلتوقساندا استانادا ۇلكەن وتشاشۋ بولادى

 بۇل تۋرالى «قازاقپارات» ح ا ا تىلشىسىنە قالالىق مادەنيەت باسقارماسىنىڭ باسپا ءسوز قىزمەتىنەن ءمالىم ەتتى.

تاۋەلسىزدىك كۇنىنە وراي، قازاقستاندىقتار قاتارىنان ءتورت كۇن (16,17,18,19 - جەلتوقسان) دەمالاتىنى بەلگىلى. سوندىقتان، «قازاقپارات» اگەنتتىگى قالالىق مادەنيەت، مۇراعاتتار جانە قۇجاتتاما باسقارماسىنىڭ باسپا ءسوز قىزمەتىمەن بىرلەسە وتىرىپ، ەل تاۋەلسىزدىگىنىڭ 25 جىلدىق مەرەكەسى كۇندەرى استانا قالاسىنىڭ قاي جەرىندە، قانداي ءىس- شارالار وتەتىنىن انىقتادى.

سونىمەن، استانا قالاسىنىڭ تۇرعىندارى مەن قوناقتارى 18 -جەلتوقسانعا دەيىن جالعاساتىن سۋرەتشى قايىپبەك كۇيىكوۆتىڭ «يادرولىق قارۋسىز الەم» اتتى كورمەسىن تاماشالاي الادى. كورمە تاۋەلسىزدىك سارايىندا وتەدى.

سونداي- اق، 16 - جەلتوقسان كۇنى ساعات 18.30-دا ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا «ابىلايحاننىڭ ارمانى» اتتى سپەكتاكل وتەدى.

جانە دە بالالارىڭىزدى ەرتىپ، 12-18 - جەلتوقسان كۇندەرى وتەتىن «جىبەك جولى» اتتى سيركتى تاماشالاي الاسىزدار. قويىلىم وسى كۇندەرى ساعات 12.00-دە «استانالىق سيرك» عيماراتىندا وتەدى.

 15- جەلتوقسان كۇنى ساعات 11.00-دە تاۋەلسىزدىك سارايىندا تاۋەلسىزدىكتىڭ 25 جىلدىعىنا ارنالعان سالتاناتتى جيىن وتسە، سول كۇنى ساعات 16.00-دە ەل باسشىلىعىنىڭ قاتىسۋىمەن «استانا وپەرادا» مەرەيتويلىق داتاعا وراي تەاترلاندىرىلعان كونسەرت بولادى.

 ال، 16 - جەلتوقسان كۇنى ساعات 11.00-دە ەكسپو اۋماعىندا «ۇلى دالا ەلى» مونۋمەنتى اشىلادى.

16- جەلتوقسان كۇنى سونداي- اق ساعات 17.00-دە «استانا وپەرا» تەاترىندا «تاۋەلسىزدىككە شاشۋ» اتتى مەرەكەلىك كونسەرت وتەدى. ءدال سول كۇنى قالا ماڭىنداعى كۇيگەنجار، ونەركاسىپتىك، ينتەرناتسيونالنىي، ميچۋرين، تەمىرجولشىلار، كوكتال-1، ءوندىرىس اۋداندارىندا دا تاۋەلسىزدىككە ارنالعان كونسەرتتەر بولادى.

 سونىمەن قاتار، 16 - جەلتوقسان كۇنى ساعات 18.00-دە «بايتەرەك» مونۋمەنتىنىڭ الدىندا تاۋەلسىزدىككە ارنالعان باستى مەرەكەلىك كونسەرتتىڭ ءبىرى وتپەك.

ال، وسى كۇنى كەشكى ساعات 22.00-دە استانانىڭ بىرنەشە اۋدانىندا، اتاپ ايتساق، «حان شاتىر» ساۋدا، ويىن- ساۋىق ورتالىعىنىڭ جانىندا، ەسىل وزەنىنىڭ جاعاسىندا، پۋشكين- ابىلاي حان كوشەلەرىنىڭ قيىلىسىندا مەرەكەلىك ۇلكەن وتشاشۋ بولادى.

18- جەلتوقسان كۇنى بەيبىتشىلىك جانە كەلىسىم سارايىندا، ساعات 18.00 مەن ساعات 21.00-دە «ءازىل الەمى» تەاترىنىڭ مەرەكەلىك باعدارلاماسى وتەدى.

وسى كۇنى كەشكە «حان شاتىر» ساۋدا، ويىن- ساۋىق ورتالىعىنىڭ جانىندا ەلىمىزدىڭ باس شىرشاسى جاعىلادى.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى