استانادا پوليتسەيدى قاعىپ ولتىرگەن جۇرگىزۋشى 16 جىلعا سوتتالدى
«استانا قالاسى قىلمىستىق ىستەر بويىنشا مامانداندىرىلعان اۋدانارالىق سوتىنىڭ ۇكىمىمەن ناگورنىح ايىپتى دەپ تانىلدى جانە 16 جىلعا باس بوستاندىعىنان ايىرىلدى. جازاسىن قاتاڭ رەجيمدەگى تۇزەۋ كولونياسىندا وتەيدى»، - دەلىنگەن حابارلامادا.
ول ەسىرتكى زاتىن ساتۋ ماقساتىندا زاڭسىز ساقتاعانى ءۇشىن جانە قىزمەت بابىنداعى ادامدى ولتىرگەنى ءۇشىن سوتتالدى.
وقيعا وسى جىلدىڭ 18- مامىرى كۇنى ساعات 23:00 شاماسىندا قىلمىستى ءىستى تەكسەرۋ پوليتسياسى ەسىرتكى زاتىن ساتۋ ماقساتىندا زاڭسىز ساقتاۋ كۇدىگىمەن "КIA Ceed" جۇرگىزۋشىسىن ۇستاۋ كەزىندە بولدى. ءبىراق جۇرگىزۋشى پوليتسيا قىزمەتكەرىنىڭ زاڭدى تالاپتارىنا باعىنبادى. وقيعا ورنىنان ءىزىن جاسىرعىسى كەلىپ، ءولتىرۋ ماقساتىندا پوليتسيا اعا لەيتەنانتى سامات شوحانوۆتى قاساقانا قاعىپ وتكەن. 27 جاستاعى شوحانوۆ ا ق ف «استانا قالاسىنىڭ ورتالىق جول اۋرۋحاناسىنا» جاتقىزىلىپ، العان جاراقاتىنان قايتىس بولدى.
سول ءتۇنى ناگورنىح ۇستالدى. جەكە باسىنا ءتىنتۋ جاسالىپ، اسا ءىرى كولەمدە گەروين تابىلدى.
